羅仲謙：有少少粉絲心態

在戲中演沙僧的羅仲謙坦言今次可以參與賀歲片大感開心，當中最難忘的一場戲是與城城對打。謙仔說：「本身預打十日嘅，最後尾打咗一個月，古裝武打嘅經驗唔係好多，今次可以話係第一次，所以預早咗一、兩個月時間去到拍攝現場跟洪金寶導演練習，效果出到嚟亦都好好。同城城合作就更開心，因自細就好鍾意佢，係我同我家姐嘅偶像。同佢合作個感覺就幾特別，有少少粉絲心態。但當我同佢一齊拍戲嘅時候，就會拋開一切。」
羅仲謙讚城城樂於指導後輩。
羅仲謙讚城城樂於指導後輩。

謙仔又稱起初與鞏俐拍攝時被對方的氣場震懾：「始終鞏小姐係一位國際巨星，我係怕怕哋咁啦。最記得拍群戲時，佢反而主動叫我坐埋嚟，一齊傾吓偈，一齊合照。拍到最尾一日，鞏小姐嘅同事送咗一張相畀我，係佢嘅相，上面寫咗一啲鼓勵說話，我覺得係非常之窩心同溫柔。」

羅仲謙（右起）與城城、小瀋陽合作愉快。
  • 羅仲謙（右起）與城城、小瀋陽合作愉快。