城城猴年發威
「美猴王」郭富城陪住大家過猴年新春！新片內能夠演活齊天大聖，城城付出不足為外人道，拍攝期間耗盡大量汗水及體力之餘，還承受皮膚過敏所帶來的創傷與刺痛，難怪他直言要趁新年新開始，帶大病初愈的媽媽入戲院分享成果，猶幸內地銷情相當理想，未開畫已錄得逾億人民幣預售票房成績，城城今次可謂飲得杯落。
「孫悟空」城城趁今日正月初一，向東方報業集團讀者拜年：「祝大家猴年心想事成，萬事如意！」談到其主演新作《西遊記之孫悟空三打白骨精》，城城謂：「呢部係我習舞30年，同集結咗拍戲20年累積到嘅武術竅門之作，以後演藝事業再遇到啲咩挑戰都唔驚嘞，應該冇嘢辛苦得過呢次啩。能夠遇到咁好嘅拍檔同團隊係開心嘅，人生演到一次美猴王覺得無憾，今次我創造咗嘅係『郭悟空』，有自己嘅特色。電影拍完後，發覺本身同美猴王不妥協、不解釋性格甚為相似。」
着特製毛衣似千針刺
今次拍攝過程長達4個月，城城因造型搞到皮膚敏感頻起水泡已不算新聞，不過當他再次談到箇中點滴，依舊令人滴汗：「電影拍攝初期，花咗兩個星期時間去拍野猴裝戲份，全身黐滿毛後起碼有6、7個鐘唔可以去洗手間。上咗妝後要盡量避免情緒波動，因為一唔開心，辛苦會乘大一千倍，所以一開工我就化身做木頭，盡量保持靜心。我平時連着衫都要第一時間剪招牌，但着咗件用魚絲特製嘅『毛衣』後，感覺好似被5,000支針同一時間拮緊。」難怪問到城城最難忘的新歲時，他想也不想便答：「一定係今個農曆新年啦。」
猶幸日前各地的優先場及首映，觀眾都對電影予以肯定。《西》片前日在港正式開畫，單日票房已收逾百萬港元，投資方老闆王海峰接受本報查詢時更報喜：「內地單係預售票房，都已經過億人民幣嘞。」消息令台前幕後雀躍不已，不過當問到城城會否考慮「再下一城」時，一向活力充沛的他謂：「暫時唔會諗嘞，都要睇吓自己體力仲應唔應付得到，或者真係出咗劇本先再傾啦。」
帶最愛入場欣賞成果
曾揚言會帶「最愛的人」入場欣賞這部戲的城城，原來已計劃兌現承諾：「初一至初三我會有幾日假，打算帶媽咪入戲院睇戲，分享吓我嘅成果。本來想佢去睇首映，一嚟佢早瞓，二嚟自從去年佢接受咗個腸部大手術後，都唔想佢去太人多嘅地方。」一向孝順的城城重提當日媽媽手術情況，仍面露憂愁：「手術足足做咗3個幾鐘，好彩嗰幾日我喺香港，咪日日喺醫院陪住佢囉，梗係希望佢猴年身體健康啦。」他又透露7月會在港有大型演唱活動，故新年願望是身體健康，應付排山倒海的工作。
文：影視組
攝：攝影組
髮型：Ian Wong @ ii Salon
化妝：郭艷君
場地：帝苑酒店
舞獅及動作指導：姜氏金龍醒師團
服飾：I.T. / A Bathing Aape / 中藝天工閣