鄭俊弘梁烈唯做廳長瞓出友情
梁烈唯踏入無綫第一個認識的朋友是鄭俊弘（Fred），男人老狗發生一次檸檬茶廣告式的偶遇將他們連在一起。自此同撈同煲、齊拍劇、捱窮、踎街邊醫肚、做廳長等等，發生的一切都令識於微時的友情更加真摯鞏固。十年人事，兩人在不同的崗位上衝刺，雖未像以前朝晚相見，但見面時依然是無所不談的「梳化兄弟」。
一切由帶路開始
梁：梁烈唯 鄭：鄭俊弘
唯唯初入無綫時人生路不熟，全靠「導盲犬」Fred自薦帶路下擦出友情。回想識於微時的日子，兩人均有說不完的回憶。
鄭：我哋識咗幾耐呢？
梁：十幾年喇，識你嗰陣我啱啱幫TVB拍第一套電視劇《青出於藍》，我哋認識好似檸檬茶廣告，好浪漫。好記得當時喺條巷度好驚慌咁周圍望，唔知去邊度換衫，跟住你就出現喇。
鄭：見你好似迷路咁，咁我咪Hi你囉：「我叫阿Fred呀，你想去邊，我帶你去啦。」
梁：係呀，你就好似隻導盲犬咁帶住我，人生路不熟嘛。一段情就係咁開始，我嘅第一次、第一套劇就畀咗你。
鄭：嗰日試鏡咁啱大家都中咗，咁啱角色講我哋係好friend，後來日日開工由朝見到晚，大家就係咁friend咗。跟住《胭脂水粉》、《法證先鋒》、《法證先鋒Ⅱ》好多套劇都一齊拍，就愈嚟愈friend。
梁：我哋真係識於微時，都可以話幾微吓。大家又鍾意夾Band，其實當年我嘅音樂造詣唔比你低，後來你就繼續玩音樂，我就繼續專心拍戲同埋掛住玩，經過十年苦練，你今時今日嘅技藝已經好犀利。有次上你屋企一路同你傾偈，你就一路練結他，花咗十年時間係好難得，所以你有今日成就唔係僥倖。
盡情窮歎任食火鍋
二人因一齊拍劇而「同居」，最記得大家一齊做廳長瞓梳化。他們笑言窮到差點冇飯開，但當年二人捱得開心，沒工作的日子就一齊夾Band過日辰。
鄭：最記得屋企住得遠，開劇嗰陣去咗你度瞓梳化。
梁：嗰陣係拍緊《青出於藍》，大家都住得好遠，我就去咗契媽沙田屋企借宿，我就叫埋你去埋契媽屋企度瞓，大家一齊做廳長，嗰陣一人霸一張梳化嚟瞓。估唔到十年後去英國拍《Do姐去Shopping》又可以差唔多瞓埋同一張床，每日又一齊開工，好似去玩。
鄭：我哋嗰陣仲成日去打邊爐，一冇嘢做唔係去夾Band，就喺屋企打邊爐。
梁：嗰陣唔覺得窮係咩，雖然當年窮到連飯都冇得食，反而好呀，唔需要諗啲時間點用，開工、夾Band，糧頭豪啲就走去食幾十蚊任食火鍋。嗰陣大家正值壯年，食到間舖頭都驚。一係收工就就去大角咀踎街邊食消夜，十蚊雞翼、十蚊煎餃、龍蝦粥、炒麵，每人都係幾十蚊。試過有次拍完套劇學人哋去中環慶功，人哋開酒，我哋就成晚攞住支啤酒，仲要慢慢飲唔好飲得咁快喎。
最希望反目成仇
Fred與唯唯曾有一段時間沒有合作，但並沒有因此影響友情。之後雖然參加《星夢傳奇》成為對手，但唯唯沒有因落敗而妒忌奪冠的Fred，反而很開心好友的唱功被肯定。
鄭：嗰陣冇乜錢但真係好開心，成班人好似返緊學咁，但係一齊拍咗幾年劇之後，大家就少合作，分開咗拍唔同嘅劇。
梁：都係一個遺憾，好似同你呢個好兄弟距離遠咗咁，呢幾年各有各忙，間中先見到，再合作直至《星夢傳奇》，咁啱又係今日呢個ball room度做記者會。當時傳媒話我係內定冠軍，我話唔係，我係貼鄭俊弘，證明我貼中。《星夢傳奇》係我哋拍劇分開之後再相聚做番節目。當時好緊張，我唱歌係行外人，有次以為自己實畀人淘汰，你就喺我身邊幫我計分，話冇事，頂得住，之後可以留低大家都攬埋一齊慶祝。
鄭：《星夢傳奇》其實我都好大壓力，始終係比賽，真係好多謝好多謝嘟姐（鄭裕玲）一句說話，令我多咗好多機會。
梁：你就厲害啦，依家變成咗好多人嘅偶像。今次去英國拍《Do姐去Shopping》大家收工好多時間傾偈，講吓工作、結婚，你又要畀啲未出街嘅歌我聽，大家都好似以前咁乜都講，覺得你真係長大咗好多，唔係以前嘅怕醜仔。我就不嬲都多嘢講，可能你想講，但係畀我講晒。以前如果有人想寸你，如果我喺度，嗰個人死梗，我一定出聲。所以今日見到你可以發揮到自己嘅才華真係好開心，依家仲多咗份迷人嘅信心。
鄭：你都成熟好多，以前好似甩繩馬騮咁，依家已經成家立室。我最欣賞你注重屋企，同埋好愛太太。
梁：其實我哋拍咁多套劇都係做好朋友，好想同你再拍劇。我哋咁多年都冇嗌過交，如果可以，拍一套我哋開頭都係好friend，後來對立反目成仇。
鄭：可以拍套好似周星馳同張學友嗰套《咖喱辣椒》咁呀。
梁：好呀，咁要靠你搵監製開喇，哈哈。
後記：一動一靜凹凸配
唯唯與Fred的性格完全相反，一個經常整古造怪，口水多過浪花，沒有一刻可以停下來；另一個是溫文爾雅的乖乖仔，說話點到即止，很難想像兩人可以如此老友。訪問時唯唯侃侃而談，Fred則默默和應，聽多於講，或許一凹一凸的配搭才能成為老友。
場地：美麗華酒店