周潤發戲癮未減 「魚蝦蟹」迎春

【陳偉立北京直擊】明日就是大年初一，神級影帝周潤發透過《東網》向全港fans送上祝賀說話，他說：「各位朋友！恭喜發財呀！祝大家猴年龍馬精神、身體健康呀！恭喜恭喜！」發哥曾說過新正頭會繼續進行其最愛的運動——「行山」！更笑言貪初一冇人行，自己可獨霸山頭做「山寨王」，早前發哥在北京接受《東網》專訪，提起行山即滔滔不絕，分析多條山路的難度，更教現場人士跑姿及換氣方法，非常親切！發哥表示今年新春除了行山，亦會招呼好友回家開「魚蝦蟹局」，一於在歡笑熱鬧中過年！

去年發哥已「登六」（60歲），古語云「六十而耳順」，發哥確實已看破世情樂觀面對所有事，問到新一年大計，發哥選擇隨遇而安，遇到適合的劇本會繼續拍戲，永不言休，希望維持每年兩部戲的產量，並透露將再與導演王晶合作拍攝新片，但並非《賭城風雲》系列，而是全新動作喜劇，2017年將繼續看到發哥的新作，實在是fans之福。

祝大家身體健康

記者：新年會點樣過呀？

發哥：都係喺屋企好似平時咁，但會多咗啲朋友嚟，有啲魚蝦蟹局咁啦！

記者：猴年有冇咩心願？

發哥：最緊要自己身體健康，呢個世界唔好咁多災害，依家天氣變化好異常，最緊要大家身體健康。

記者：自己工作計劃係點？

發哥：順其自然！有人請你工作咪做囉！又或者角色啱，你喜歡就做。

記者：舊年發哥拍咗兩部戲，係咪都會Keep住呢個產量？

發哥：拍太多身體都負荷唔到，你話80年代仲後生時就得者，依家就審慎啲，一部還一部啦。

記者：導演王晶透露將會同你再合作，大約係點？

發哥：依家仲構思緊，大概都係喜劇、動作為主。

記者：2017年上映？

發哥：相信係，如果係４、５月拍，都係想趕過年，我諗。

文：影視組

攝：秦健輝