胡定欣為愛練膽撩男友跳傘

胡定欣、黎耀祥、蕭正楠（Edwin）及唐詩詠等無綫新劇《公公出宮》演員，昨日到啟德東華慈善嘉年華宣傳，眾人在台上玩「年廿八，洗邋遢」遊戲應節，定欣抽到鮑魚刷，為祥仔清潔屁股，唐詩詠抽到百潔布，為蕭正楠清潔腳趾。眾星之後又玩機動遊戲，詩詠在玩碰碰車時，更不慎刮損右手拇指流血。

爆楊怡「結婚」

定欣坦言恨去嘉年華已多時：「我想嚟嘉年華玩好耐，但我唔玩得跳樓機，好驚！（同男友一齊玩，會大膽啲？）咁又未試過喎，唔知呢，反而我想去外國玩Skydiving（跳傘）。（又話驚？）感覺離地遠啲。（拍拖孖住跳？）即係『You jump，I jump！』咁呀？唔知可唔可以一齊跳。（周潤發喺《東網巨星》嘅《發哥有say》話怕傳緋聞，婉拒咗你嘅行山邀請？）唔怕啦，發哥肯陪我就得。（佢話等你同男友散散地至約佢？）發哥好百厭，好曳！」定欣指情人節要開工拍劇，暫未知收工時間，故未有節目安排。

蕭正楠有幸獲唐詩詠幫手清潔腳趾。

唐詩詠在玩碰碰車時，不慎刮損手指流血。

提到曾傳不和的楊怡遲遲未落實續約無綫，定欣一時口快說：「之前同佢傾偈，知佢就快約滿，但佢咩諗法，我就唔清楚，若有新方向都支持佢，或者佢一年拍一兩部，又做吓其他嘢，唔知係咪又因為就嚟結婚。（佢話你知要結婚？）唔知呀，總之做咩都會支持佢。」無綫助理總經理杜之克昨日回覆本報，指正與楊怡傾談續約，但外傳楊怡推劇、決定不續約，則屬流言。

蕭正楠晒腳趾

祥仔則笑言對新劇收視冇壓力，他說：「新正頭個個出晒埠，冇人睇電視，我有藉口！（定欣指呢個班底短期內唔會合作？）拍過《大太監》、《名門暗戰》、《公公出宮》，需要有啲新意，個別組合或者會有，咁齊腳就少啲，觀眾要珍惜！」Edwin出動腳趾谷劇，他笑言：「犧牲小小色相啫！（女友黃翠如有幫你清潔腳趾？）唔使，呢啲自己搞，我好注重個人衞生。」

文：影視組