開心果鄭欣宜肥得精彩
「所有記憶都是潮濕的」皆因大多回憶都由淚水組成，對於鄭欣宜來說，總是活在淚水與歡笑之間。別人眼中的開心果，卻曾為減肥流淚、為喪母流淚，還有為戀愛流淚。曾為甩掉「終極豬扒」之名而搏命消脂的她，近年在網上宣布不再減肥，只求健康，向全世界證明：「欣」有自信，所「宜」美麗。
鄭欣宜拍過三次拖，一次比一次愛得投入，甚至一頭栽進愛情世界裏，且愈陷愈深失去自我。直至去年與攝影師男友分手後，從淚水中學懂自愛。拭乾眼淚後，欣宜繼續等待白馬王子出現，希望趕在六年內圓人妻夢。
感情投入易受傷
「其實我唔係拍過好多次拖，三次咋，分手總係Hurt o架啦。最近嗰次分手都算係最傷，一齊咗差唔多兩年。我覺得愛情唔係一件理智嘅事，就算我平時喺工作同生活上好理智，對於愛情我係好唔正常，不受控制。因為我覺得愛情同其他嘢一樣，唔投入、唔認真係唔會得到好結果。你唔膽粗粗去博一鋪大，冇可能會贏到。我發現人愈大，拍拖就會愈認真，因為我已經唔係18歲，開始會諗結婚，對感情認真咗，傷害就愈大。好多人都問我有冇遇過男朋友偷食？但我真係唔方便講，始終我嘅前度大家都知係邊個。」
空窗期學識獨立
「依家都算空窗咗一段長時間，其實我一直感情生活都好順利，往往呢段關係完咗，好快就搵到下一個。但今次我想用多啲時間去認識自己，愛惜自己，因為咁快展開一段感情唔係一件好事。因為我每次拍拖都好投入，會有少少失去咗自我。想提醒番自己，我係個獨立個體，唔需要身邊有人，我都可以做到一個開心嘅人。成日講話要尊重自己，人哋先會尊重我，愛情一樣，我要識愛自己，人哋先會愛我。」
中英都識仲要Fun
「雖然呢段時間都有人追，但人慢慢成長，知道自己鍾意啲咩，需要啲咩，愈嚟愈難搵一個真心鍾意嘅人。我鍾意嘅條件都幾簡單，首先要性格Funny，唔可以只係我氹佢笑，同埋要有上進心。最麻煩嘅係，佢要中英都識講，因為溝通對我嚟講好重要。我攰嘅時候淨係識講英文，但某啲嘢又要用中文先解釋到喎，加上喺一段關係入面，互相欣賞好重要，如果我對象唔識中文，佢咪唔識欣賞我唱歌囉。」
34歲結婚趕生B
「始終大家都知我爹哋、媽咪係邊個，細個真係有擔心啲追求者有壓力，但依家就覺得冇乜所謂。要發生嘅始終會發生，個天都安排咗。依家我又唔覺單身好Dry，冇乜所謂啦。當然我唔想自己做高齡產婦，因為會好辛苦，所以希望35歲前生到仔，即係要34歲結婚，都係順其自然啦。」
最討厭雞仔媒人
「不過好彩嘅係爹哋（鄭少秋）從來都冇催過我結婚，由得我。以前拍拖嗰三個男仔都有帶過畀佢見，佢唔會唔OK o架，我開心就得。同埋佢從來都唔會介紹男仔畀我識，因為我唔鍾意，就算有啲朋友話想幫我約男仔食飯，我都唔鍾意。因為我係一個好容易尷尬嘅人。 」
有人說，減肥是女人的終身事業，欣宜起初為了不做肥婆而搏命減肥，試過孭啞鈴跑山而令膝頭受傷，醫生建議終身不要再做運動。幸好身體最後逐漸康復，但同時意識到健康比消脂重要，她決定反其道而行，在社交平台宣布拒絕減肥，從此不再為別人而活，從心而發的自信魅力令她更見光芒。
做運動只求健康
「最近我睇番，原來我發表篇（拒絕減肥）感言已經係2014年6月嘅事，時間過得好快。我最近有跑吓步，但唔可以話係Keep Fit，係Keep Healthy。始終磅數肥咗咁多，一定要做多啲運動，如果唔係個人好易攰。同埋個人重咗，要做番多啲背脊肌肉訓練，咁樣先冇咁辛苦。」
孭啞鈴跑山傷膝
「其實主要想做運動幫助膝頭同腳腕承受多啲力，如果唔係咁重會容易受傷。仲記得兩年前我聰明得滯，走去跑山，仲要孭住兩個啞鈴喺書包度跑。嗰陣未決定唔再減肥，所以想積極啲減。但原來上山、落山好傷膝頭，跟住就整傷咗，醫生同我講：『你唔可以再做運動，只可以游水。』原因係因為重咗咁耐，膝頭已經好弱，再做運動只會更加傷。嗰段時間真係好惆悵，心諗醫生叫我減肥，但又唔畀我運動，咁我點減呀？最後買咗個腳箍保護膝頭，慢慢就冇事啦。」
鬼妹性格愛性感
「除咗做運動外，最近我都好鍾意曬太陽，我覺得着泳衣影相冇問題。香港非常保守，普通一個女仔着衫露咗Bra帶出嚟都大驚小怪，可能我喺外國長大，唔覺得係咩問題。就算有機會挑戰性感角色，導演冇問題，我都冇問題，主要係睇劇本需要啦。」
口述：鄭欣宜
筆錄：倪民清
髮型： Milk Chan＠Xenter
化妝：Samuel＠江中平化妝室
服裝：Microwave
場地：Pizza Express