周潤發解不鋪張慶生之謎
【陳偉立北京直擊】神級影帝周潤發向來生活簡樸，去年60歲生日大日子，亦只跟身邊人食盆菜低調度過。發哥日前在《東網巨星》的全新節目《發哥有Say》第三集親解不選擇鋪張大搞生日party的原因，他認為BB誕生日其實是母親最危險的日子，因此不應大事慶祝，反而應該感謝媽咪，籲大家做個孝順仔女。
影帝周潤發去年5月正式「登六」（60歲生日），作風一向低調的他只與太太「發嫂」陳薈蓮相約一班好友到元朗食盆菜平靜度過，發嫂又為發哥預備乳酪生日蛋糕，兩人頭貼頭親密自拍，已經甜蜜爆燈！新聞曝光後，大批網友都留言表示驚訝，國際巨星發哥竟沒有大排筵席慶祝60歲生日。
日前發哥在北京接受專訪，親自剖白原因，向來孝順的他認為生日應該感激母親，自己不一定要鋪張慶祝。
應該同媽咪分享
記者：舊年發哥60歲生日，好低調咁食個盆菜，點解咁低調唔大搞？
發哥：咁做係啱嘅，媽咪生你係佢最危險嘅時候，其實你生日係應該同媽咪去慶祝，唔應該你慶祝，幸運地你媽咪生咗你而佢冇死到，你應該同媽咪分享，唔應該媽咪拎個蛋糕叫你吹蠟燭：「吹蠟燭啦仔！生日快樂呀！」應該係你感謝媽咪：「媽咪！多謝你咁辛苦生咗我！」
「發哥效應」累人
記者：你知唔知你去完食肆，即刻有好多食客幫襯，佢哋booking爆晒，電話都要轉埋，因為有「發哥效應」呀！
發哥：哎呀！咁我累咗佢喇！佢哋嘅盆菜係好食嘅，冇鮑魚、冇蝦、冇燒肉，得好地道嘅豬皮、蘿蔔、豬紅，盆菜本身就係咁簡陋o架啦！如果你有蝦嗰啲，就叫金牌盆菜啦。
網民有say：愛着乜底底？
網民：平時發哥係着三角底褲定孖煙囪嘅呢？
發哥：兩樣都有，視乎拍戲嘅時候啲衫係緊定係鬆囉！
攝影：秦健輝