張家瑩擲百萬 登陸開餐廳
新一年重新出發！早前約滿亞視的前亞姐張家瑩（Grace），趁年廿八，洗邋遢，實行在自家餐廳大掃除，寓意洗走衰氣！她更準備豪擲7位數字在成都及杭州開分店，攻入大陸市場！而歌手蕊蕊與師妹Milkis，則為身體「洗邋遢」，做通淋巴美容。而去年憑騎呢上位的組合FFx，更煲腐竹糖水，洗腐皮兼洗走負評！
曾在亞視打滾近八年的前亞姐冠軍張家瑩（Grace），早前終於約滿。原來Grace前年8月與朋友合伙在銅鑼灣開設食肆，升呢做老闆娘。今日是年廿八，她到自家餐廳實行大掃除，寓意洗走衰氣！
為食肆投資達7位數的Grace，一直心急回本，惟當時經濟未見好，她笑言：「剛開張嗰時生意幾差，我哋都捱得好辛苦。最後比預期遲咗大半年先回到本，上年中秋我哋先第一次分錢，分到大概6位數，嗰刻我感動到喊咗出嚟！」她自認是「先死而後生」，至今食肆上了軌道，她銳意再下一城，預計投資7位數在金鐘開設分店，之後再於成都及杭州開分店，她說：「當地有投資者朋友同我傾過，成都同杭州都有商場畀到我開舖！我都未知開幾多間，如果太多間嘅話，可能要分特許經營權畀人。」
蕊蕊掃紅底
而歌手蕊蕊與師妹Milkis則為自己身體洗邋遢，做通淋巴美容，蕊蕊表示會買新內衣旺猴年：「買啲紅色同粉紅色，寓意希望由頭旺落尾，旺足成年！」講到蕊蕊被屢傳與男友金剛情變，但她笑言「金剛」不怕洪爐火：「我哋真金不怕洪爐火，所以唔使做太多呢啲表面嘅嘢，大家心裏有數，我哋自己知就OK啦！」而Milkis則出法寶希望引財入屋：「屋企會開晒啲門同窗，等啲財入嚟，呢個係一個好好嘅意頭！」
FFx洗負評
至於推出歌曲《Sugar Baby》成為被惡搞的對象的組合FFx，去年是非多多，四人趁年廿八炮製腐竹糖水，在製作過程中洗腐皮，寓意洗走所有「負評」！她們透露於年初四舉行演唱會，近日積極練舞，務求以超水準演出。FFx又表示今年會推出新歌《MK Pop》，談到歌名可會擔心被網民再度取笑時，四人都為MK Pop而自豪：「無論MK Pop或K-Pop都好，總之pop得起就係好，深信努力做好大家就會喜歡MK Pop！」
文：專案組
場地：Vigor Beauty