陳茵媺大肚着高踭走勻星馬步步驚心
懷胎六月的陳茵媺（Aimee）早前為杜汶澤主演、執導電影《開飯喇！》宣傳，走勻馬來西亞、新加坡的商場及大型首映禮。腹大便便的茵媺如此捱得，難怪獲杜汶澤大讚：「佢好好，因為佢大肚，我哋都擔心佢嚟唔嚟到宣傳，但佢二話不說嚟咗，仲走勻咁多地方，真係好多謝佢！」
全程扶實請食「撈生」
二人甚受馬來西亞、吉隆坡市民歡迎，所到之處都逼滿群眾。早前於新加坡、馬來西亞住上一段時間寫劇本的阿澤，在宣傳期間送上名貴補品給Aimee外，還帶她食盡當地馳名的賀年食品「撈生」。阿澤笑言希望Aimee：「撈得生多，愈生愈多！」
該片在新加坡舉行大型首映禮期間，杜汶澤太太田蕊妮（阿田）都有現身。阿澤搞笑地大讚阿田同陳茵媺：「茵媺好好，佢嚟之前，試咗四十幾條裙揀咗呢條嚟首映，我太太阿田都好好，佢試咗一條裙，就揀咗嚟首映着。」首映禮上，阿澤又經常扶住穿上高跟鞋的茵媺並謂：「佢好貪靚，大肚都仲着高踭鞋，真係一步一驚心，我全程扶到實，唔敢怠慢。」
文：影視組