甄子丹過年開工 子女冇詐型
「宇宙最強」甄子丹春節因為要拍新戲頻撲開工，沒有假期陪家人一起度歲，他承認每次回港看見小朋友愈長愈大，因未能好好陪伴子女成長，感到心噏，幸好子女已習慣了他的工作方式，沒有詐爹哋型，十分生性。
甄子丹昨日以主禮嘉賓身份出席時代廣場「龍獅盛宴」展覽開幕禮，即場施展一招「金雞獨立」拿着獅頭擺甫士拍照，大顯功架，歌手關楚耀、JW及藝人黃浩然亦有到場支持。丹爺今次出席，因為覺得很有意義，是中國文化又是香港傳統，值得支持：「我拍嘅戲都好多呢啲場面，一定要支持。」他的一招「金雞獨立」企得穩如泰山，他說小時候母親開武館，雖然未有教他舞獅，但他有學過，亦試過為電影金像獎頒獎禮舞過獅。
頒獎禮似食嘢口味
早前亞洲電影大獎公布入圍名單，丹爺憑《葉問3》獲提名最佳男主角，談及信心時他說：「冇乜所謂，頒獎禮呢啲就好似食嘢咁之嘛，有啲菜式有人鍾意，有人唔鍾意，唔鍾意又唔代表唔好食，各花入各眼，各有胃口。我都係做好自己嘅戲，最緊要係觀眾支持，觀眾鍾意係最首要嘅。」
身為藝人付出代價
今天丹爺啟程飛往北京做春晚表演，在武術環節中帶領年輕人和小朋友表演功夫，回港後又即時去開拍新戲，農曆新年都沒有假期，子女可有詐型？他說：「冇得詐型，冇辦法，都慣咗。」難得其子女小小年紀已如此生性，明白爹哋要忙於工作。可會有任何補償？丹爺說：「其實有時好難取捨，做電影人最辛酸唔係拍戲有幾辛苦，拍戲梗辛苦，係表面風光，生活作息唔定時、冇得隨時想返屋企就返屋企、冇得陪屋企人。每次我返嚟見啲小朋友，都愈來愈高、愈來愈大，都心噏，但冇辦法，呢樣係做藝人其中一個條件。（會減少工作陪屋企人？）冇話減少定增加，做娛樂圈工作睇緣分。（咁忙咪冇得追多個？）呢樣要問我太太，隨緣啦！」
文：名人組