劉佩玥阻陳瀅煙韌 詩詠城竹在胸
情人節倒數9日，一眾圈中女神大感期待。與賭王四房公子何猷亨熱戀中的女神陳瀅，將過首個情人節，可是「情敵」劉佩玥（Moon）卻硬要「介入」做電燈膽！至於「絕世好女友」唐詩詠表面就話計劃情人節非分內事，但實質就畀晒idea男友洪泳城，認真識做！
劉佩玥（Moon）去年與賭王之子何猷亨傳緋聞之際，新紮女神陳瀅突然反高潮認與猷亨拍拖！今年「瀅亨」將過首個情人節，Moon竟揚言要做電燈膽！她昨日出席無綫明珠台《愛的季節》節目宣傳時，自爆情人節要與「情人」陳瀅度過：「陳瀅約我同何雁詩o架，唔係我約o架，陳瀅太愛我哋喇！」
陳瀅接受本報電話訪問時，聞言驚訝謂：「係咪Moon一廂情願？我同佢、何雁詩都冇傾過，未有計劃。」之後陳瀅即致電Moon求證，再回覆謂：「原來好耐之前我哋約咗話情人節要去某個地方，地點唔透露啦！（唔同男友過？）唔知，佢都有可能唔喺香港，但我就一定會去見Moon。」問到Moon成功做了電燈膽？她意有所指說：「可能係我做電燈膽呢，依家變咗我需要佢，多過佢需要我陪佢！」
細水長流唔使送禮
至於與Moon一同出活動的「十優港姐」麥明詩（Louisa），透露與男友林作未有情人節計劃，還呻男友不懂浪漫：「佢對我係細水長流，唔係浪漫型，佢sell搞笑同輕佻！」問到最想收甚麼禮物？Louisa謂：「唔需要，佢唔係鍾意親手整嘢嗰啲。（畀緊怨言佢？）唔係，依家大個咗冇咁多童真。」
香香男友分隔兩地
而「絕世好女友」藝人唐詩詠昨日出席活動，直言計劃情人節的行程非分內事：「情人節都唔係我諗嘅，我係畀個Plan佢（男友洪泳城）帶我過澳門，嗰日都要做嘢，可以前後慶祝，同埋我都未收到邀請。」詩詠又透露想試吓澳門單車環島遊。至於岑麗香前晚出席團年歡宴時，透露準備寄神秘禮物給男友強強慶祝情人節：「到時我喺香港，佢喺溫哥華，候補畀大家。」
文：專案組
採：影視組、名人組