袁偉豪咀唐詩詠投訴鼻高就位
唐詩詠、袁偉豪、黃德斌、陳庭欣等昨日出席劇集《鐵馬戰車》宣傳，期間大玩賽車電動比賽，由袁偉豪奪冠，詩詠得第三名，詩詠自言小時候已把玩具當揸車，18歲即考車牌，她有意稍後到珠海玩賽車。
談到劇中與袁偉豪有場咀戲，卻被對方踢爆NG了六、七次仍認為未夠激情，詩詠說：「都冇NG，因為場戲都幾緊要，事前搵咗好多唔同影、視作品畀袁偉豪睇，但佢睇完冇反應，唔理我就行開咗，後來佢就話場戲應該溫柔啲，最後我相信佢，用佢提議嘅溫柔版本。（錫咗好耐？）都耐，因為要唔同角度。」袁偉豪則透露為營造浪漫氣氛，特別於現場播放情歌，方便投入情緒，但他投訴說：「詩詠個鼻高，kiss時要就位，我唔知佢咩習慣。」詩詠聞言即說「冇習慣」，場面惹笑。
笑到面紅話唔知
拍咀戲前可有向另一半備案？袁偉豪表示當時與現任女友岑杏賢感情未發展成熟，詩詠則說：「大家喺呢行都好明白係做嘢。（平時兩邊咀都得？）唔知呀！（洪永城有冇嫌你鼻高？）唔知呀！」對於同劇的蔡思貝未有現身活動，詩詠笑謂：「驚咗我？佢今日有嘢搞啫，我會提出同佢一齊拉筋，都要恭喜佢入圍金像獎，要慶祝吓！」由於劇集上周最高收視為30點，詩詠笑指穿泳衣慶祝的重任，將交由陳庭欣負責。
黃德斌在劇中與簡慕華有親熱戲，平日甚少拍這類戲份的他直認講起都尷尬，問場戲是否好激？他說：「都激，但唔知最終剪成點。拍時冇諗咁多就唔尷尬，好在每次拍呢啲戲份對手都熟，希望監製盡量就一就，唔好要我咁盡啦。」
文：影視組