周潤發捧學友攞影帝叫張家輝讓路
一班巨星包括周潤發、劉嘉玲、張家輝及張學友前晚出席電影《賭城風雲III》首映，席間眾人妙語連珠大放笑彈，周潤發與劉嘉玲唱雙簧，要今屆香港電影金像獎影帝候選人張家輝讓獎給學友，學友亦不示弱搞笑地請各界留意：「我喺印度攞過（影帝）o架！」
賀歲大片《賭城風雲III》前晚在灣仔會展舉行盛大首映禮，導演王晶、劉偉強及主要演員周潤發、劉嘉玲、張家輝及張學友等星級陣容難得在港聚首，吸引半百傳媒採訪，藝人王子涵、鍾采羲、吳業坤、張秀文、莊思敏、唐紫睿、王君馨和文凱玲等亦盛裝撐場。周潤發在首映禮上充當自拍神，滿足粉絲合照要求。
「我喺印度攞過o架」
周潤發率嘉玲、學友和家輝接受訪問時，周潤發發揮幽默本色說：「我哋套戲真犀利，有三個影帝（今屆香港電影金像獎最佳男主角候選人），張學友唔好行咁慢，扮大牌啦！不過如果問我，我都貼張學友攞影帝。嘉玲，係得我同你冇（提名）咋喎！張家輝你讓吓你大佬（學友），佢未攞過！不過呢條友好狠，冇得讓o架！」
學友聞言搞笑「自辯」說：「真係好鬼可憐，我喺印度攞過o架，都感受過(0架)！不過嗰時印度經濟唔好，冇搞頒獎禮，淨係通知有獎。（張家輝笑你個獎有咖喱味？）佢成日話自己係後輩，又話當年攞身份證報錯，佢真實年齡好複雜，我都唔知佢幾歲！其實在座得一位睇過我套戲，其他冇睇過，冇問題，我嘅戲係冇乜人睇過。（點睇網上有人因王晶而發起罷睇《賭III》？）你同我講出去，呢套戲同王晶無關。」
搵埋賭聖四代同堂
周潤發經學友提醒後說：「印度，好厲害啊！（點睇罷睇事件？）王晶淨係喺片場瞓覺，不過瞓醒又知拍到邊度。（想拍第4集？）拍4百集都拍，如果我拍到嘅話！（想集齊周星馳、張家輝合作？）係呀，想四代同堂（賭神、賭聖、賭俠等），星仔肯嚟就得！（好難請得佢郁？）世上無難事。（張學友話易都唔會有《家有囍事》加長版！）因為黃百鳴做導演。（有乜問題？）佢要做男主角嘛，做導演點做男主角？除非好似張家輝咁，又導得又演得，好心張家輝咪鬼追得咁狠，讓番個影帝獎出嚟畀人啦！」
叫拍檔跳海谷戲
躺着也中槍的張家輝說：「我都係為興趣啫，發哥！」問到有否信心《賭III》破上集票房紀錄？家輝搞笑說：「20億票房是個底數，各位繫好安全帶，準備迎接票房爆升。（有信心打低周星馳《美人魚》？）我哋套戲好開心，睇完都健康啲，行得快啲，錢都搵多啲，想好運就睇我哋！」周潤發忍不住笑謂：「張家輝去跳海就有機會20億，（會展）後面有個海呀！」幾位巨星你一言我一語，令現場充滿笑聲！
文：影視組