37歲陳鍵鋒黃金剩男等Timing
藝人陳鍵鋒近年甚少在港露面，十年前他是無綫力捧小生，深得觀眾歡心，但他卻毅然決定北上發展，主攻十三億人的市場。十年過去，如今的他已成為「收視保證」，事業如日方中！至於幾時定下來，買樓兼成家立室？他笑言未到Timing！
事業上想「發圍」，攻入內地是其中一條光輝路，近年不少藝人都爭住北上發展，務求打入大中華市場吸人仔。而藝人陳鍵鋒早在十年前就看準內地這片黃金地。回想當年初踏入內地，他帶着理想與不安感，最大的困難是要適應當地文化，思鄉病更是嚴重。
投入內地搵共鳴
「本身都有喺內地工作過，覺得都幾好吖，之後我就諗點解唔嘗試去一個新嘅市場睇吓，去一個更大嘅舞台呢？我覺得要去投入內地市場，一定要去內地住，要放棄同屋企人見面嘅時間，否則入唔到當地文化。如果我同對方講嘢，大家冇共鳴，已經冇咁好。
靠電話克服思鄉
「氣候、飲食、生活習慣上都要重新適應，最難可能係過時過節，要適應佢哋嘅習俗，例如聖誕節我都要去橫店開工。過年時，我都返唔到屋企，單靠電話聯絡，尤其是頭一年我的思鄉病更加嚴重，當時我真係好掛住屋企！雖然依家都係咁少時間見面，但心態上已經唔同咗好多。呢種唔係麻木嘅，只係習慣咗，而我屋企人都已經習慣咗過年過節我都要喺內地開工。」
陳鍵鋒的演藝路可算順利，在無綫時期被力捧，攻入內地後一步一步來，一年內由配角做到主角，目前更是當紅小生。在內地，他可算是「收視保證」，去年他在劇集《封神英雄》中飾演史上最年輕的靚仔姜子牙，收視穩居全國首三甲。而最近他主演的內地劇《美人如玉劍如虹》未播出，內地網民已相當期待，登上微博熱門話題榜首。對他而言，人氣比獲獎更為重要，皆因他只是一位娛樂大眾的「戲子」。
人氣比獎項重要
「我喊得快過你代表我勁過你？演戲唔係咁，呢幾年我擴闊咗自己眼界，好多人演戲好叻但唔代表佢係一個好嘅『Entertainer』。我份工都係做緊一個Entertainer，係要畀到觀眾喺工餘時嘅娛樂，所以我覺得獎唔重要，有幾多人睇我，我帶畀觀眾幾多娛樂，先係我最重視嘅一點。我唔會好崇高咁諗，做演員係個理想，唔會當自己做緊一個Artist藝術家咁。如果我真係一個藝術家，我去咗畫畫，或者唱Opera啦！」
陳鍵鋒不愛受束縛，甘願做「無腳雀仔」。事業如日方中的他，不想停下來，享受不斷遊走的生活，見識不同的人與文化，閒時周遊列國，享受人生。至於成家立室？他直言未到時候！
不買磚頭免束縛
「買樓真係一個咁大嘅Issue？當然我都有啲投資，但唔係用嚟住。我喺內地不停走嚟走去，我都幾Enjoy依家唔使被層樓縛住，唔需要有呢個責任。我平時會租一個地方，將所有日用品放入去，得閒先返嚟住。我依家嘅情況係成日去唔同地方，所以我希望另一半唔介意我周圍去。
事業型愛異國戀
「你都可以話我事業心重，我暫時仲未放低呢種周圍走嘅工作模式。有好多人話內地女仔吸引，雖然我係經常喺內地，但我又唔會限死自己要搵個內地女仔做另一半。我反而覺得日本女仔幾吸引吖，ABC都好，我好鍾意同唔同文化嘅人相處。不過，組織家庭都唔係砌沙堆啦，唔係話有就有。」
後記：心境年輕冇架子
陳鍵鋒外表似o靚仔，但其實已經37歲，他經常周遊列國豐富人生，心境年輕，與他對話有趣而輕鬆。在娛樂圈打滾近廿年，卻又毫無架子。
口述：陳鍵鋒
筆錄：張敏妍
攝：司徒國榮
場地：Island Seafood
服裝：ISSEY MIYAKE