Rain港騷晒舞功 扭籮放電 廣東話謝粉絲
韓國男星Rain相隔6年再度來港開騷，一眾粉絲期待已久，吸引大批粉絲到場支持。Rain為粉絲準備了高質素的舞台表演，戴上墨鏡型爆登場的Rain不時放電冧粉絲，惹來粉絲瘋狂尖叫。
韓國天王Rain相隔6年再度於香港亞博開騷，吸引來自亞洲各地的樂迷前來捧場，亦有圈中藝人專程來朝聖，當中包括無線藝人姚子羚及歐陽妙芝等單拖到場，黃美棋就孖住緋聞男友鍾健威「拍拖」睇騷，羅霖則帶同囝囝前來。內地女星黃聖依及其經理人老公楊子獲Rain邀請，特地從北京抵港睇騷。
粉絲high爆
一眾粉絲期待已久演唱會約於8時半開鑼，舞台的大銀幕營造暴雨的震撼效果，並由舞蹈員率先踏上吊索空降舞台，接着戴上墨鏡及身穿銀白色型爆裝束的Rain華麗登場，更大嗌：「Are You Ready？ 」令全場粉絲即時high爆，叫到拆天，他隨即獻唱《It's Raining》一曲揭開序幕，期間還脫下墨鏡單眼放電冧粉絲，惹來粉絲瘋狂尖叫，暈晒大浪。
台上劈腿
其後他以極具爆炸力的舞步演繹《I'm Coming》一曲，劈腿兼擘髀，大晒「舞」功，又大嗌：「Everybody say my name!」並再次脫下墨鏡及扭籮，令粉絲冧爆。他又炒熱氣氛說：「What's up Hong Kong！」更以廣東話感謝粉絲：「多謝，大家好，我係Rain，好多謝大家光臨。」之後再用英語問大家他剛才廣東話說得如何，非常可愛。
文：外娛組