JW靠團火重新出發

歌手JW（王灝兒）去年約滿黎明旗下的A Music轉簽新公司，推出新歌《矛盾一生》唱到街知巷聞，談及歌曲意思時，她直認是向朋友收集故事及憑個人經歷得出idea，主要講相處久了的情侶，男方不懂發憤努力，女方會很矛盾，未知該去該留？JW說：「搵另一半要搵個好愛自己嘅，咁個男人會為你計劃埋將來，唔想大家下半生過得辛苦，女仔有咗明確目標就唔會介意一齊捱、有咗安全感就唔會矛盾，總之女仔青春好寶貴，聽完首歌會有共鳴。」

同新公司好夾

JW感謝老闆Eugene給予肯定，公司方向跟她夾到絕：「Eugene好相信我，亦好相信我嘅聲音！呢間公司好有火好有目標，我畀呢樣嘢感動到，成team人一齊畀心機。」她亦未有忘記在A Music得到的一切，幾年來不覺得浪費時間，亦冇放棄過：「我一路增值自己，學唱歌跳舞又做gym。我曾經有question過自己，有諗過喺呢行仲值唔值得留低，但屋企人同朋友都支持我、撐我！」

JW對樂壇發展充滿信心，最想將來開個唱。	JW（左）難忘與黎明（中）及衞蘭合作的日子。	曾經掙扎過的JW，要做出成績來。

目標set定開騷

JW坦言夢想開個唱，但深明不能心急：「喺A Music嗰段時間經歷好多嘢，同Leon（黎明）同台係我榮幸，又同Janice（衛蘭）合唱，仲有雷頌德畀好多機會我！最難忘係上紅館唱歌同埋《男人信什麼》拎到金曲金獎，當時係第一年入行，未識真正珍惜上台攞獎嘅感覺，好似唔真實嘅事。做歌手一定想開騷、開巡唱，呢個係我目標，但要儲多啲好歌先，再配合天時地利人和，所以依家都係喺音樂上逐步逐步行！」

文：陳丹

攝影：劉智源

髮型：Hin Wan@il colpo

場地：Oldish