泳兒畀男友激發搞到停驚

即將推出新碟的歌手泳兒（Vincy），繼兩隻翻唱碟後再唱新歌，充滿期待的她更定下特別要求：「我係需要慢慢消化隻歌講咩，所以要求攞到份詞要試晒Key，隔一、兩個禮拜畀我諗清楚要點唱先再錄。」今次Vincy參與新歌歌詞構思，特別加入電影《玩轉腦朋友》的概念：「我知我係『阿驚』，好多嘢都會驚青，所以會唔怕蝕底都寧願花啲時間準備，然後就諗不如寫隻歌講呢十年點去尋找勇氣，隱喻番愛情都係咁，要有勇氣接受或者放手。」

受感染愛旅行

Vincy與男友Ziv拍拖四年，她坦言因「驚青」個性，對戀情起初沒信心，皆因男友與自己當初「杯茶」完全不同，卻因時機而鼓起勇氣接受戀情：「嗰陣工作壓力大，需要人關心，可能係我最脆弱嘅時候喇！同埋我Open咗，以前覺得唔係我鍾意嘅類型就Say No，但今次覺得不如試吓，講真冇諗過去到依家咁。」她又認為拍拖對唱歌、人生與性格都有另一番體驗及改變，更被男友感染而愛上旅行，每次旅程都對工作增添靈感，又因拍拖後認識不同類型的人，社交上都變得較容易。

泳兒自認以往是「阿驚」，工作上甚至連拍拖都會驚驚青青。

泳兒與男友拍拖多年，雖已半同居但未諗結婚。

直認已半同居

雖然Vincy自認是「阿驚」，但男友同時激發她其他的元素：「佢成日話我歇斯底里，如果要做一樣嘢點都要做咗佢先，但佢好識享受生活，有Feel先會做，我成個人會好躁！」不過，她直認多虧男友，改善容易受驚的性格：「我願意嘗試、接觸多啲嘢，好似佢話學潛水牌，我都係有人陪就會去學，轉新造型都係因為佢而去試，初初都有啲擔心，但朋友都話我染金後個人開朗咗。」她透露與男友現屬半同居狀態，同樣覺得要活在當下及現時要為事業衝刺，坦言未有時間為結婚作打算。

文：音樂組

攝：吳文聰

髮型：Ziv.Y（www.pi.4.com.hk）

化妝：Miko Wong（Cyrus Lee Team）

服飾：N12H