郭富城文武兼備交足內心戲

郭富城在星皓有份投資的《西遊記之孫悟空三打白骨精》中，接甄子丹棒演孫悟空，Aaron說：「子丹演得好好，佢嘅方式近似內地演孫悟空馳名嘅六小靈童再加功夫，但我呈現嘅係完全唔同，以往觀眾唔係好見到演員樣，今次好多內心戲畀觀眾感受，所以今次係人猴各半。（鍾意做牛魔王定孫悟空？）演員無論做乜角色都喜歡，既然委派重任畀我，我要用心排除困難做好佢，不過着起戲服、化好妝，原來比想像難。唔應該講係『辛苦』，因為已經超越咗『辛苦』！」

讚謙仔值得栽培

Aaron拋金句之餘，又讚與他大打出手的羅仲謙，他說：「謙仔不斷進步中，我大佢好多，佢算係Next Generation中上緊嚟嗰批，好值得栽培。至於演白骨精嘅鞏俐，佢未做過呢類魔幻電影，起初仲估佢吊咗上威吔會唔會連對白都唔識講，但佢好專業，係呢個角色不二之選，佢嘅演出令戲味提升！」

羅仲謙獲笠高帽，他說：「我唔係擦鞋，郭富城係我偶像！但我同佢拍打戲，冇留力，工作為先，其他嘢在心中！（佢睇好你上緊位？）今次我演嘅沙僧係同一路以嚟嘅好唔同，係全新性格、全新演繹，我勝在冇乜壓力，因為冇之前嘅演繹者去比較！」

一身肌肉的羅仲謙，今次沒有露真身，反而穿上厚重的肌肉衫。

導演鄭保瑞大讚城城與謙仔演得出色，有信心電影票房理想。

打造全新美猴王

問到鄭保瑞有否信心突破上集12億票房？他說：「我冇壓力，盡量唔去諗，拍好部戲先，我有好演員、好製作，觀眾會識諗，今次同上次係兩個唔同風格嘅戲，我同自己講當新戲拍，唔係繼承，係新嘅孫悟空，新嘅風格！」

另外，Aaron及導演鄭保瑞接受有線訪問，問二人對「白骨精」鞏俐表現如何？Aaron大讚首次吊威吔的鞏俐聰明：「學得好快，又要打，又要平衡真係唔容易，佢真係唔怕死。」鄭保瑞笑言：「佢可能因此會愛上拍武打片，今次大家都拍得好有默契，已約定將來再合作。」Aaron笑認拍此片辛苦，因化妝後不能飲水及去廁所：「真係唔知點解可以捱到4個月。」

文：影視組

攝：劉智源

場地：Crowne Plaza Hotel Causeway Bay

郭富城髮型：Ian Wong@ii salon

郭富城化妝：Terry Yu

羅仲謙髮型：Jan Chiu@IL Colpo

羅仲謙化妝：Leo Tam@Annie G.Chan

羅仲謙服裝：A Bathing Ape