傅穎打破Dry缽 蜜戀內地男

由北京返港的傅穎（Theresa）昨日出席大埔超級城的活動，透露剛加盟內地演員姜武的公司「知者樂乎」，合約年期則不便透露。她表示未來以內地工作為主，希望多拍電影及電視劇，音樂工作則會自己負責，今年亦會再次出書、人形公仔及Figure公仔：「舊年懶咗，好多工作拖延到今年，希望今年實踐晒所有答應粉絲嘅承諾。」

怕醜唔肯洩蜜

提到打算為其設計的Figure公仔pigsa整個「男朋友仔」，現實中可有為自己搵個男友？Theresa即甜笑怕醜說：「嗯！」隨即點頭承認蜜運中：「OK啦！我都咁大個人。」但她不肯透露男友的身份，只甜笑說：「嗰啲細節唔講，我覺得自己呢個年紀拍拖都好正常，咁就拍住先。」問到新年將至可會到男友家拜年？Theresa支吾以對笑說：「我喺香港，做幾日……唔好問我呢啲嘢啦……唔識答，哈哈！講多幾講我就講晒出嚟！」言語間洩露男友應是內地男生。

Theresa曾與內地男星付辛博傳緋聞。	Theresa與羅仲謙已成過去，情路重新出發。	Theresa出席大埔超級城活動，與其他嘉賓合照留念。

未有打算閃婚

至於與男友發展至甚麼階段？Theresa笑說：「OK啦！總之開心囉！（閃婚？）閃婚？暫時冇呢個計劃，到時真係結婚會同大家講。」不過，她透露今年情人節要在工作中度過，問到男友會否陪她開工？Theresa又忍不住哈哈笑說：「多謝晒各位，希望大家放心，我搵到男朋友。」全程如沐春風由頭笑到落尾，心情靚到爆。

文：音樂組