黃翠如蕭正楠奉旨上床

無綫藝員黃宗澤、蕭正楠、黃翠如、張繼聰、陳煒、劉佩玥、鄧佩儀和莊思敏昨日出席無綫新劇《幕後玩家》的拜神儀式。蕭正楠劇中與黃宗澤、張繼聰三兄弟一齊打江山，至於感情線，蕭正楠則對身旁的黃翠如說：「感情線梗係同你啦。」訪問時講到與男友蕭正楠奉旨拍拖，黃翠如笑說：「都幾驚訝，估唔到咁大膽搵我哋做情侶。」蕭正楠說：「劇中我哋愛得好深，由初戀到誤會，佢去咗美國，然後再返嚟追番佢，有場戲模仿咗好多經典電影角色，講咗好多愛的宣言。」

黃宗澤亦正亦邪

問到有沒有床戲？蕭正楠說：「有呀，不過係同張繼聰多啲，講佢住喺我屋企，唔知點解有房唔瞓，係要入嚟我房瞓，仲要瞓喺我心口流晒口水。同翠如都有少少，因為講佢有怪病夜晚失眠，佢每晚要攬住我先瞓得着。」黃翠如則表示暫時未知有沒有咀戲。

剪了短髮的鄧佩儀（右）與劉佩玥以「黑衣女郎」造型示人。	露紅底的莊思敏在現場整理衣衫。	露紅底的莊思敏在現場整理衣衫。

黃宗澤在劇中希望將公關公司發展成商業王國，角色亦正亦邪，不擇手段。他更艷福無邊，除了有老婆姚子羚、情婦劉佩玥，與翠如亦有曖昧關係，問與翠如是否都有咀戲？黃宗澤笑言：「冇，我哋只係精神上，有啲曖昧啫，希望出街時唔會畀網友鬧。」

鄧佩儀短髮嗌爽

黃宗澤指監製陳維冠希望新劇玩另類，反映社會黑暗面，事實上，現實中很多成功男士屋企有老婆，出面有個情人，但劇情沒有影射成分。問黃宗澤可希望享齊人之福？他笑說：「唔好喇，好煩嘅，一個都搞唔掂，仲講兩個，何況我依家係零個。」

為劇集剪短頭髮的鄧佩儀則說：「由十幾歲開始長頭髮都未試過剪短，冇唔捨得，反而覺得好爽，好方便，可能之後都未必留番長。」劇中她與張繼聰有感情線，會否有親熱戲？她說：「暫時未知，如果劇情需要都會配合。」

文：影視組