關禮傑摸肥妹仔打冷震

近年喜劇演上癮的關禮傑，於劇集《鬼同你OT》中演陰險上司，搞笑功力令觀迷留下深刻印象。早前阿關獲品牌邀請，以劇中造型拍廣告，與男扮女裝的「肥妹」合作放笑彈，輕鬆吸金！阿關笑言今次是犧牲色相，又強調今次對手是他悉心安排，透露有「重口味」互動情節：「本來公司係安排我同靚女拍嘅，但係想個效果好啲，我就提議犧牲吓喇！導演仲要求我『溫柔啲』，嘩！摸到佢下巴啲鬚根真係打晒冷震！（酬勞滿意？）係朋友公司邀請嘅，友情價當然滿意！」

呻諗笑點頭痕

談到喜劇演出深獲劇迷認同，阿關指是日子有功：「自己習慣去研究角色，演喜劇都會諗多啲嘢去加強角色，好似今次個『二撇雞』都係自己諗！近年多咗演喜劇，自己都好Enjoy，因為可以浮誇啲，演啲同自己好唔同嘅角色。（喜劇會輕鬆啲？）反而係更難！因為同一個笑點唔可以用第二次，每次都要再諗一套新嘅畀觀眾，幾頭痕。」

關禮傑與男扮的「肥妹仔」有「重口味」互動情節，認真大犧牲！

關禮傑不敢直視「肥妹」，睇佢個樣知難頂！

期待拍《鬼》續集

阿關與《鬼》劇拍檔田蕊妮、胡定欣及陳豪等合作愉快，原班人馬將開拍續集《來自喵喵星的你》（暫名），他笑言相當期待：「大家好好戲，諗盡辦法搞笑，拍嘅時候好融洽。新劇2月就開工，難得原班人馬開續集，梗係要留定期拍啦！」

文：影視組