林子祥預告重現玉石樂隊

擁有無數演唱及舞台經驗的Lam，面對下周演唱會舉行在即表現零緊張，事關他早已做足準備：「因為自己諗掂咗呢個演唱會好耐，四十周年都走唔甩，一定要做。自己諗咗呢個方向好耐，揀歌又揀咗好耐，而我做任何事都鍾意多啲時間準備，我唔鍾意臨急臨忙呀，或者唔知自己做乜呀！」

老婆兒子擔任嘉賓

Lam笑言自己的音樂旅程其實不只四十年，問會否分不同階段？他笑言：「都分幾遠o架，如果真係講時間，都差唔多跨晒我呢一世，會講1975年以玉石樂隊入行，所以今次四十周年，我會捉番『玉石』佢哋上台，有大AL（張武孝）、細AL（楊雲驃），除咗威利因為拍戲，其他都齊晒五個人，連埋我六個。（散Band後第一次合體？）係呀，第一次。（用乜招數引佢哋出山？）唔使引佢哋，佢哋都唔知幾咁開心，大家都鍾意音樂，點會需要引。（好期待？）一定啦，因為好代表一個階段。（用以前個造型出場？）咁又唔使，呢個等溫拿去做啦。」

林子祥開騷，老婆葉蒨文與囝囝林德信當然撐到行。	玉石樂隊成員大AL已落實擔任演唱會嘉賓。	由於準備充足，下周開騷的林子祥毫無壓力。

除了「玉石兄弟」外，Lam還專程請來「Boxing婆婆」睇騷。他開心說：「已經叫啲舞蹈員等我唱《吖嗚婆》時跟番『Boxing婆婆』啲動作節奏，你知佢郁得好有特色。」當然Lam的太太葉蒨文和兒子林德信亦會擔任嘉賓。

飛債纏身想開早場

提到四場演唱會令Lam飛債纏身，他謂：「唔好問我，我都希望啲飛係我印，但可惜唔係我印。（加場？）想加都冇期，我都話早場都可以唱o架。（早場你唱過？）試過啦，去拉斯維加斯都有唱過中午場，接住唱夜場，喺香港就未試過。（主辦真係開早場點算？）得o架，如果佢哋夠時間準備都可以諗吓。」原來Lam在紅館早有創先河首例，他於1983年是首個設計四面台的歌手。

文：音樂組

場地：六和素食