SG望Encore衝擊紅館

（左起）：Aka、Yanny、Heidi、Cheronna、Jessica
Super Girls盼明年添食再開演唱會。

五人女子組合Super Girls於去年假九展Music Zone舉行一場音樂會，門票公開發售反應熱烈，令五女喜出望外，為以最佳狀態示人，除晚晚在排舞室秘密練兵，更下禁令齊齊戒食，SG的音樂會在一片歡呼聲圓滿結束，放下心頭大石的五女出席慶功宴時如「餓狼」般狂塞美食入口。

裝備自己

SG自約滿星煥國際後一直由經理人公司JAMCAST自資做歌及拍MV，音樂會成功得到行內人讚賞，SG即向經理人提出今年添食，據知，JAMCAST深思熟慮後希望食住五女氣勢將她們推上更大舞台，近日開始物色多個音樂會場地，Aka承認有向公司要求再開騷，她說：「無論結果如何，依家最緊要裝備好自己，希望畀大家覺得我哋有進步。」

Super Girls去年底開騷反應理想。

Yanny（左）和Aka大快朵頤，狂塞美食入口。

五女坦言紅館是「終極目標」，同時感激公司的愛戴，Yanny說：「之前我哋冇唱片公司都幾迷惘，好彩經理人公司用心用力幫我哋，畀咗好多機會我哋。」唱得又跳得的Cheronna說：「有同公司講開一場真係唔夠喉，下一目標希望係Star Hall。」而Heidi則說：「開騷當晚幾失落，好想跳多幾晚，之後幾晚都瞓得唔好，瞓到都不停發有關音樂會嘅夢。」

文：音樂組