羅嘉良3月回巢視后送秋波
自2009年拍畢《富貴門》後，羅嘉良將於3月重返無綫，開拍由黃偉聲監製的劇集，今次更是度身訂造角色，故嘉良見盛意拳拳下應承，不少女星如「視后」胡定欣及唐詩詠等坦言期望與他合作。
已有六年多未有替「娘家」無綫拍劇的羅嘉良，最後一部參演的是2009年台慶劇《富貴門》，現時他一直於北京居住及於大陸拍劇，但監製黃偉聲最近成功邀得嘉良回巢拍新劇，共20集約需兩、三個月拍攝。嘉良回應時指對返港拍劇感開心，亦相當喜歡劇中角色，坦言期待再見到舊同事。據知，他農曆新年會返港度歲，3月正式開工。
配搭有新鮮感
對於今次回巢拍劇，角色可謂是為嘉良度身訂造，監製黃偉聲受訪問時說：「咁一定好啱佢做先搵佢！其實一路都有同佢聯絡，但之前佢喺大陸拍嘢，所以未有機會傾成。（嘉良睇咗劇本？）劇本未有，但就傾過故事同角色，佢都覺得好有趣！（無綫出『天價』定『友情價』？）呢方面就唔係我傾，係由其他部門去傾。」至於女主角的配搭，黃監製坦言仍未定案，問到嘉良會否有想合作的女星？他透露對方未有要求：「我心目中有啲人選，但仲未定，對嘉良嚟講當然未合作過，會有更多新鮮感。」
唐詩詠爆「淵源」
消息一傳出，視后胡定欣與備受無綫重用的唐詩詠都坦言期待與嘉良合作，定欣說：「真係o架？好期望有一日同佢合作，但應該冇我份啦，我三月要拍《來自喵喵星的你》！（感可惜？）真係好期待，希望之後仲有機會同前輩合作。其實我入TVB時佢都喺度拍緊，自己雖然仲係新人，但見面時都會打招呼，細個都係睇佢啲電視劇大！」詩詠亦坦言雖然未曾合作，但初出道時卻有「淵源」，原來是她的首個緋聞男友，她說：「嗰陣影到佢同一個女仔一齊，個樣好似我，結果無啦啦傳緋聞！我好鍾意佢o架，好想有機會一齊拍劇，一定獲益良多。」
文：影視組