徐榮B女拍劇享巨星級待遇
「馬家」回歸處境劇《愛‧回家2》後再添家庭成員「馬家好」，四代同堂，更添「家」的溫馨！原來現實中B女是劇中演員徐榮的親生囡囡徐心怡，只有三個月大、「出道」不夠一個月，不但受到網民熱捧，在劇組更有「巨星」地位，無論是監製、導演，抑或「大Sir」劉丹都要敬讓她三分！
處境劇《愛‧回家2》召喚「馬家」回歸後，馬子仁（羅天宇飾）與老婆Pinky（阮兒飾）誕下B女「馬家好」。原來馬家好的真實身份是劇中演員徐榮的親生囡囡徐心怡（乳名包包），只有三個月大的包包眼仔睩睩望住鏡頭，一出鏡就融化大人的心，不但備受網民熱捧，亦大受劇組愛戴。
「出場一次計一次錢」
《愛‧回家2》劇組裏不乏資深前輩，但「出道」不夠一個月的包包，卻有至高無上地位！徐榮笑指包包得到「巨星」待遇，監製羅鎮岳為邀請包包演出，曾向他保證：「每次返工唔超過三個鐘，每星期唔超過一次。如果我應承，佢會導演、編劇、PA所有人夾，叫導演拍包包嘅戲先，編劇編少啲包包嘅戲份，叫編Rundown嘅同事編到包包唔使等，拍戲時可以一次過拍晒。我一聽到，呢啲係巨星待遇，咁樣我唔應承唔得啦！」
「包巨星」降臨劇組，所有演員都顯得「戰戰兢兢」，徐榮沾沾自喜說：「一有家好嘅場口，全部都係一Take過。大家都好錫佢，唔想佢等得太耐。唔只咁大家仲會拍戲前消毒隻手，有場戲劉丹要錫錫家好，為咗呢場戲劉丹特登事先去刷牙！」「包巨星」今次處女演出，有甚麼酬勞？徐榮說：「佢當返『特約演員』咁，每出場一次計一次錢，不過最重要係有個紀錄價值，可以同爸爸一齊拍劇。」
兩大法寶氹女
包包雖然還是個手抱嬰兒，但拍攝時已很「專業」，徐榮說：「一Roll機佢唔喊，尤其喺丹爺錫嗰場戲，丹爺每講一句，佢就好自然識畀反應。」為令包包拍攝時更投入，徐榮隨身帶備兩大法寶「獅子仔」和「麵包超人」，這兩個毛公仔可以令包包零舍聽話。而導演幫她拍喊戲時也別有辦法，徐榮說：「冇包包戲份時，導演就會將個鏡頭對住佢，一直等，捕捉佢喊嘅一刻，之後再拎嚟用，笑戲都係咁拍。」
文：專案組
攝：嚴偉國
場地：PaperClip