范振鋒唔見50萬Bob棄股買樓
恒生指數昨日跌749點，跌穿萬九點心理關口，港股踏入2016年持續疲弱，再加上鄭少秋近日為新片《美人魚》唱插曲，不少股民慘呼「丁蟹效應」再嚟料。除兩名大戶趙薇和章子怡分別在短短廿天蒸發逾億外，香港娛圈「蟹民」也人心惶惶。前後損手逾50萬的范振鋒跌到怕，講明不敢再入市；趙哲妤亦帳面蒸發30萬。而「投資王」林盛斌斷言市況差，已主力轉攻細價樓等收租！
港股近日在走資陰霾下，持續低迷。踏入2016年，恒生指數在短短20日累跌3028.1點，昨日收市狂瀉749.51點，跌穿萬九點心理關口，令圈中股民人人自危。大戶影星趙薇和章子怡損手損得最甘，趙薇持有的阿里影業（01060）踏入2016年，已帳面蒸發4.35億元。至於章子怡母親李涿生持有的萬達商業地產（3699），亦令她帳面唔見1.5億，實在嚇人！
隨着鄭少秋近日與莫文蔚為周星馳新片《美人魚》翻唱插曲《世間始終你好》，不少股民慘呼「丁蟹效應」再「嚟料」。昨日記者致電秋官，其妻官晶華代答：「秋哥冇咩講呀，大環境不佳！」就連平日乜都肯講的秋官也避談今次「小股災」，明顯是不想捲入今次跌市。
趙哲妤撈底入貨
圈中「蟹民」人心惶惶，有玩股票的范振鋒大嗌怕怕：「之前有玩開能源股，都有賺六位數，點知依家輸凸，前後唔見近50萬！都係唔玩喇，我又唔係西裝友日日對住個Mon睇實個市，唔會再入市！」其妻李思欣則說：「我搞鑽石生意，股市跌令啲人少咗消費意欲。我冇玩股票同基金，只係擔心市道愈來愈差。（你有份經營保齡球場內的餐廳？）保齡球場拉勻係賺錢，但裏面間餐廳就蝕少少，唔方便講個數。」
至於前中國小姐趙哲妤也表示已損手：「個市跌有撈底入貨，跌到萬九點先入貨，我冇買細價股，都係買港交所，始終有日會升番萬九點。之前啲藍籌股喺高位已放晒，細價股就未放，依家係坐艇狀態，放喺度由佢跌，暫時唔諗溝貨。我就唔信跌到萬四點，不過今次（帳面上）都蝕咗30萬左右。（覺得已跌到盡？）唔敢講盡，可能低處未算低，哈哈！」
山埃貼士累離場
至於向來甚具投資心得的林盛斌（Bob），原來已一早醒目離場，現只持有幾隻大藍籌收息：「我幾年前有人畀山埃貼士，搞到唔見幾十萬。我依家都冇再買股票，只淨番幾隻大藍籌，都唔會放，咪當收吓息！」Bob又表示已轉攻投資細價樓：「投資磚頭買細價樓仲好，依家樓價跌，要入貨咪叫業主再減囉，我都係買嚟收租睇長線！」他又表示市道不景，其製作公司生意跌了３、４成，惟有開源節流！
文：專案組