蔡思貝花名賽車貝龜速新牌仔
蔡思貝及袁偉豪等前晚亮相無綫新劇的首播飯局，自稱花名為「賽車貝」的思貝近期考獲車牌，她自爆揸車慢，又不時整花愛車：「揸車仲試過刮花架車同撞凹車門！」同場袁偉豪堅稱不怕與思貝拍劇傳緋聞，隔空向女友派定心丸！
藝人蔡思貝（Sisley）、袁偉豪（Benjamin）及吳家樂等前晚於旺角，出席無綫劇集《鐵馬戰車》的首播飯局。提到該劇題材與駕駛有關，Sisley大爆於外國留學時曾出意外，慘被的士撞倒：「我踩單車望錯方向，畀的士撞到擦傷同撞瘀。（香港有冇試過？）我攞牌冇耐，試過揸車刮花自己架車，仲試過早上開工就撞凹車門。」問她會否找緋聞男友麥秋成「補鐘」學車？她即自認車手：「唔會，我都係車手，我花名叫『賽車貝』，因為試過載賴慰玲由將軍澳去九龍城用咗兩個鐘！」原本30至45分鐘車程，她卻花上兩小時，認真誇張。
短訊慰問秋生
問到Sisley有否留意其演戲師傅黃秋生的兒子於外國炒車？她表示已傳短訊慰問對方：「我話希望佢個仔冇事，佢答『OK，冇問題，多謝』，希望佢個仔快啲好番。」
新劇首播接棒收視不俗的《無心法師》，問會否感壓力？Benjamin則笑稱冇壓力，因為近日已做足密集宣傳。問他與有「發電機」之稱的Sisley合作，怕不怕傳緋聞？Benjamin笑認自己是女友岑杏賢的專屬發電機：「唔驚，因為我都係發電機，hold住電力留畀另一半。」
袁偉豪恨生B
問他可有載女友遊車河？Benjamin直言會用電單車載女友兜風：「好有『天若有情』mood，不過會凍到流鼻水。」提到不少圈中人近期拉埋天窗，Benjamin大爆想40歲前有小朋友：「有好消息會公布。（開始準備？）諗過40歲前有BB，我依家34歲仲有時間。」
文：影視組