何浩文獲婆婆安慰：知你辛苦！
何浩文（Dominic）現身戲院為主演的3級片謝票，大爆父親曾帶其外婆入場觀賞，外婆更安慰孫仔：「知你辛苦！」同場現身的鍾采羲（Iris）被發現額頭受傷，她笑謂自己慘遭家暴，且打趣：「獨居老人真係要小心啲。」
Dominic前晚偕同《鴨王2》拍檔文凱玲、唐紫睿及Iris現身銅鑼灣戲院謝票，期間與觀眾玩遊戲及送禮物，Dominic與文凱玲被圍着要求合照，場面熱鬧。事後二人孖住做訪問，異口同聲表示知道戲中結尾的性虐場面及笑位成影迷的亮點：「導演拍太真實嘞，血腥加暴力，Iris最終仲死埋添。」
Dominic認為今次較上集更具故事性，且燈光及鏡頭擺位不俗，當問到首映後有否問「未來女友」意見時，他說：「呢幾日我好忙，未問佢呀，不過我老竇完場就拍吓我話幾好，又同我講：『睇你下部做啲乜』，似乎畀緊壓力我，叫我拍第二啲嘢，而我阿媽就話好眼瞓。我唔敢諗父母睇到我嘅床戲有咩反應，上集我老竇竟然帶咗我阿婆去睇早場，睇完後阿婆同我講：『知你辛苦嘞！』」
鍾采羲遇「家暴」
至於Iris現身時則被發現額頭有傷，她竟開玩笑謂：「屋企發生家暴呀！講笑啫，我冇戴眼鏡，所以跣低咗，好彩用手卸咗啲力，獨居老人真係要小心啲。我其實好容易受傷，之前同鄭欣宜拍打戲，佢冇事，我就拍到周身瘀。」
文：影視組