女神周秀娜翹實坤坤變硬漢

周秀娜、吳業坤、莊思敏、莊思明、張惠雅、狄易達、梁雨恩、陳蕊蕊、黃又南、溫家偉、周美欣及前無綫新聞小花黃紫盈等12位紅星歌手昨日出席《東華慈善嘉年華隆重開幕暨藝人挑戰日》，曾封周秀娜為「女神」的吳業坤連環遭司儀陸浩明擺上枱：「同周秀娜拖手唱歌刺激定同周秀娜玩機動遊戲刺激？」又叫他拖周秀娜的手，吳業坤當然不敢答應，反被取笑「暗爽」，搞到他不得不承認說：「係！偽宅特徵。」

無膽「抄牌」食檸檬

其後，周秀娜與吳業坤一同受訪，當記者要求搭女方膊頭時，變「怕醜草」的吳業坤只用手輕掂對方膊頭，看不過眼的周秀娜即主動翹實他的手，被記者取笑硬軚的吳業坤還緊張到低頭似望有否「動L」，搞到周秀娜忍不住傻笑！已有兩年未有見「女神」的吳業坤坦言緊張，對於將周秀娜跌落其「女神」榜第三位，他解釋因少見對方，並補飛讚對方：「欣賞佢嘅言行同演出，佢係青春可人同真心。」氹到女神哈哈大笑。

吳業坤與周秀娜等藝人一齊試坐「陀飛輪」，對女神呵護備至！	吳業坤對女神呵護備至！	陳蕊蕊玩機動遊戲係咁轉，不停揮手勁High！

對於「女神」地位被降呢，周秀娜大方指冇唔開心，但身旁的吳業坤已緊張標汗兼眼鏡又起霧，她即說：「唔好逼佢啦！佢滴晒汗呀！」吳業坤坦言不敢「抄牌」（索電話號碼），怕忍不住會打擾對方，而周秀娜亦以「在心中」拒交換手機號碼，慘食檸檬的他晒金句：「一份感情唔係建立『抄牌』上，做嘢見面就得喇！（幾時才敢再拖玉手？）適合場合啦！原本諗住有機會玩機動遊戲時借啲意拖佢，依家太多人唔好喇。」周秀娜即笑說：「佢好有風度。（追你會接受？）如果先算。」

周美欣坐上「超級搖滾」，準備揈上半空。	莊思敏（右）與莊思明激讚「超級紐約滑梯」，充滿「快」感！	黃紫盈與狄易達（左）及溫家偉玩跳樓機前留影。

黃紫盈認有拖拍

而黃紫盈自言對過山車非常熱衷：「因為只係得衝力，其實我係好Sporty！（大膽到玩跳降傘？）有機會會試！」她又自爆試過玩浮潛時遇溺，幸得團員相救，講到玩危險活動要有男友相伴，早前被爆有男友的她說：「男女朋友一齊玩都會安心啲，（影到你拍拖？）係健康感情生活，總之見到乜清楚過我啦！」

文：音樂組