江若琳單身馬拉松未見終點

預留嫁妝 風光出嫁

專注內地掘金的江若琳，原來她的媽咪已為她準備了不少金器，讓他日出嫁時所佩戴，原來江媽媽總是以各種形式，間接或直接地「催婚」。

「我以前係冇儲開金飾，但呢1、2年有啦，因為一嚟金價跌，二嚟係保值，其實好多人仲停留咗以前嘅金器時代，其實依家嘅金飾已經非常Trendy，好啱後生仔女戴，仲會戴得好有型，加上除咗保值外，又可以一代傳一代，好似婆婆留畀我嘅金器，經歷咗幾十年時間都不褪色。（媽咪係咪已準備定嫁妝？）媽咪有準備，佢會開個保險櫃畀我睇佢嘅珍藏，有好多金器同戒指，跟住就同我講『等你嫁嘅時候就可以全部攞晒出嚟畀你戴』，（即係催婚喇喎？）間接催婚，媽咪會用唔同方法催婚，呢樣係其中一種方式。（咁你點回應？）我話好呀，等吓先。」

「我仲係單身長跑緊，好似跑緊馬拉松，跑咗好幾年，里數都幾多，不過我自己唔心急，我覺得一段好嘅姻緣同感情係需要等待，同埋到目前為止都未有一個人可以畀到我啱嘅感覺。（要有咩條件先啱？）一定要有上進心，孝順父母，心地善良，同埋唔好對我講大話，大家要坦誠相處，就算做錯咩事都要同我講，我會即時原諒。（就算有第三者都原諒？）我覺得誠實係一件好勇敢嘅事，講出嚟需要勇氣，但我都會睇吓有幾錯，做人要有保留同底線。」

新的一年，江若琳希望事業發展順利，可以一圓置業的夢想。	近年主力在內地拍劇掘金的江若琳，也希望可以多留香港。	自問適應力強的江若琳，深信到哪裏也有立足之地。

見慣風浪 隨遇而安

仍是自由身工作的Elanne表示現時生活很好，感謝客戶和導演關顧，並坦言近年親身接洽工作，從中可學習到如何照顧自己，揚言自己擁有超強適應能力，到哪裏都可生存，更笑言喜歡大風大浪的日子，不習慣平靜生活。

江若琳以馬拉松比喻她的感情路，是一場漫長競賽。（資料圖片）

江若琳鍾情金飾，當作投資保值。（資料圖片）

「每個人成長都有不同階段，由乜都唔識好似小朋友咁畀人照顧，到依家大咗從中學習吓點照顧自己，（最困難係咩？）其實冇乜困難，因為我身邊都有好多貴人幫助，而我依家主喺內地發展多啲，但都想多啲時間喺香港，好多年冇出歌，計劃今年會出一隻EP嚟分享自己嘅故事。（返內地發展初時難習慣嗎？）我適應能力強，去到邊都好適應同能夠生存，我性格唔係嬌生慣養，咁多年嚟都係咁捱，邊度對我嚟講都一樣，反而我覺得喺內地做嘢自由啲，可以戙高腳坐同大啖食飯，令人好放鬆。」

「就算係之前曾發生戶口剩低好少錢事件，我覺得其實每個人出嚟捱有呢個情況係好正常，所以我都唔記得咗啦，其實每個人都需要過程，唔會話一出嚟做嘢就發達，我唔係天才，我需要去捱，所以我對依家嘅大風大浪好隨遇而安，如果嗰個月生活得好平靜，冇事發生，冇負面新聞，我會唔係好慣，覺得好神奇。」

鑽石物業 報答劬勞

生活經過不少大風浪的Elanne表示幸好從以往至今，均獲得媽媽無限量的全方位支持，方可讓自己度過最艱辛的日子，並全力追求及完成夢想，寄望可讓媽媽當「業主」以報親恩。

「我冇乜錢嘅概念，每個月收入係畀晒媽咪，投資同管理都係佢負責，我就每個月問媽咪攞人工，同埋我上年第一次真正買咗粒1卡左右嘅鑽石送畀媽咪做母親節禮物，可以兩個人一齊用非常抵，又保值，呢份係我入行以來，第一次買咁有意義嘅禮物畀媽咪。（媽咪有冇曾經叫你放棄呢行？）有呀，喺我最難過時，我曾經去咗英國讀書，媽咪喺精神同金錢上都全力支持我，當時我喺英國收到佢嘅訊息都喊，佢同我講『10年前，你好想去實現夢想，我幫你去實現，但如果10年後，你喺呢行做得唔開心，想實現另一個夢想，我就算唔食都會幫你去實現』，所以由呢刻開始，我知道無論我幾辛苦都唔可以驚，因為有個人需要我去報答，我好想成功後買層樓畀佢，同佢一齊住，就算以後結咗婚都想住佢隔籬。」

文：名人組

首飾：Just Gold

服裝：bread n butter

場地：ClubONE博藝會