唯唯術後休養暗無天日

無綫小生梁烈唯（唯唯）去年曾患上眼疾，因眼內血管畸形，黃斑位置更有水泡，醫生當時建議他做手術，但他再覆診時因情況好轉而暫時擱置手術。不過兩個多月前，唯唯再去檢查時驗出病情有變，診斷後為黃斑點病變中的其中一種「中漿症」，醫生指一定要入院做手術，否則遲些恐變盲，並已於昨晨完成手術。

隊咖啡易出事

手術後，唯唯受訪時表示壓力大、食煙、捱夜及飲得太多咖啡等人士最容易患上此病，自言明顯是壓力大所致，加上愛飲咖啡，笑言今後要同咖啡「割席」：「前一晚入院打啲螢光劑做啲測試，今朝（昨晨）入手術室做手術，用凍激光做手術，將眼內畸形血管導致有水泡嘅虛位封咗佢，以免影響視力。」

唯唯做手術前自拍，神情依然輕鬆。	唯唯「見光死」，需戴特別眼鏡及全身包到冚休養。	唯唯去年已有眼疾問題，被拍得到眼科求診。

由頭包到落腳

唯唯透露只是入院一日，現已回家休息，但因眼睛不能接觸光線，醫生提供了一個特別眼鏡，戴上後全屋變成「黑房」般！由於曾注射光動力治療藥物會有過敏反應，故身體其他位置亦不能接觸光線，唯唯在家仍要戴上冷帽及大褸，需要閉關休息多日。

對於避過變盲一劫，唯唯不忘提醒大家留意病因：「依家啲人好多時睇電話，尤其係鍾意熄晒燈喺床撳電話、又或者鍾意夜晚飲咖啡嘅朋友就要特別注意，因為食咗咖啡因嘅嘢，眼壓會即時提高，黃斑位微絲血管就好容易破損，好似我咁！希望大家小心保護雙眼。」唯唯又透露不少親友到醫院探望，令他大感溫暖。

文：影視組