欣宜靠Supper Moment走出失戀陰霾
歌手鄭欣宜與攝影師男友結束兩年情後，在經歷失戀的過程中，欣宜就如被「癌症」般煎熬，每次在鏡頭前對人歡笑，背人垂淚，最後全靠狂煲Supper Moment的歌，令這顆開心果從低谷重踏上「無盡」的旅途。
鄭欣宜最近與樂隊Supper Moment（SM）推出最新Rock歌《分手是常識吧》，還未正式合作前，欣宜曾擔心遭對方嫌棄，可是後來一拍即合：「初初都好擔心，我咁主流，唔知佢哋會唔會睇我唔起，但後尾又唔會喎，大家反而好夾，原來我哋笑點一樣咁低。有樣嘢我好欣賞佢哋，就係佢哋個個都好想首歌錄到最好，聽完覺得有美中不足都會要求補錄，力求完美。」
每日喊到死去活來
今次兩個單位看似大纜都扯唔埋，但原來早已因為「分手」而結緣，欣宜去年初與拍拖兩年的攝影師男友分手，剛甩拖的她每日哭到死去活來，全靠Supper Moment帶她走出陰霾：「佢哋陪伴我渡過一個人生難關，年頭我要宣傳《你瘦夠了嗎？》，咁啱撞正自己失戀，呢首歌要好有自信架嘛，咁我由邊度再攞番正能量呢？呢個時候我就喺網上搵到SM首歌叫《無盡》，我每日做訪問、做宣傳前都要狂聽呢首歌，當然試過聽到喊啦。」
唱分手歌重新出發
最後黃偉文剛好為欣宜寫了一首講分手題材的《分》，為欣宜再打了一支強心針：「首歌係講分手都係一件好正面嘅事，歌詞有句『癌症能割掉』，如果一件事唔好，千祈唔好覺得個天要跌落嚟，其實可以自己解決，割咗佢就得架啦！」
由於今次新歌曲風有別從前，歌曲監製要求欣宜演繹一種「反枱式」唱法，最後她在錄音室唱到聲嘶力竭：「唱Rock歌真係好攰，我錄完音之後，全身都喺度震，因為用咗好多力，要谷到好行先反到枱嘛，連我都未聽過自己呢把聲。」
文：音樂組
髮型： Milk Chan @ Xenter
化妝：Samuel @ 江中平化妝室
服裝：Microwave
場地：Pizza Express