陳芷尤擂台肉搏 豪乳受襲

【黎寶倫深圳直擊】擁34D噴血上圍的陳芷尤最近踩入大銀幕,首次為處女作《少女打擂台》擔大旗,火速「升呢」的她自然瞓身搏到盡!早前偕羅天池拍打拳訓練戲時,穿低胸小背心的陳芷尤更被打中「豪乳」,「男友」張振朗卻指她識保護自己,十分放心。

跟「翻版Cool魔」張振朗傳緋聞的陳芷尤,早前與藝人羅天池在深圳拍新片《少女打擂台》,首次擔正做女主角的她一點也不錫身,不但以低胸小背心大晒四吋事業線,還慘遭「食過夜粥」的羅天池狂毆,纖腰更被狂樁至「砰砰」聲。期間,男方的拳頭不慎擦過陳芷尤波邊,她惟有「硬食」不敢作聲!

被讚反應快

事後,問到有否打錯重要部位?羅天池說:「唔會,我打得好準,因為我教開拳,知道打邊個位。(或者陳芷尤套錯位呢?)唔怕,大家都專業、排晒,加上佢反應好快。」至於「男友」張振朗有否叫羅天池好好照顧她?陳芷尤即尷尬地說:「唔知喎,呢啲佢哋私底下傾,天池都好照顧我,因為《愛‧回家》成班演員都好Close,唔使交代都好照顧我。」問到是否好揪得?父親當過拳手的陳芷尤笑稱:「女仔嚟講應該揪得。(好打過張振朗?)未試過,我從未同人打過交,我都想試吓。(同張振朗打?),始終男仔大力過女仔。(佢咁斯文唔太打得?)都係嘅,估計都係我叻啲!」

張振朗唔care

對於陳芷尤「豪乳」被誤揪,張振朗表示對方識保護自己,作為朋友亦不會太擔心:「天池係個高手,點會咁唔小心打中,就算唔小心打中都好,大家為拍戲都唔會有啲乜嘢嘅。」他又大讚「女友」叻女兼畀心機練習,兩人在演技方面也有互相交流:「佢都有問過我意見,我都將自己喺《愛‧回家》學到嘅嘢同佢講,佢都了解、一點就明。」