方力申整喊Stephy又攬又錫

藝人方力申(小方)、鄧麗欣(Stephy)等前晚出席新片《紀念日》慶功宴,小方在台上發表愛的宣言,揚言希望與Stephy二人世界過拍拖十周年紀念日,又送上零食籃,令Stephy感動落淚,小方更兩度錫女友臉頰,閃爆全場!

藝人方力申(小方)、鄧麗欣(Stephy)、岑日珈等前晚出席電影《紀念日》慶功宴,電影截至6日,累積票房已衝破1300萬,下周亦會推出2小時的加長版。小方在台上指即將踏入與Stephy拍拖10周年紀念,望當日可以與女友過二人世界,更送上親手挑選的零食籃,令聽到愛的宣言的Stephy感動落淚,二人深情抱抱,小方更應要求錫Stephy臉頰兩次。

叫老闆請去旅行

小方指若票房過1500萬,可考慮叫老闆請去旅行,他說:「蘇梅都好,遠啲可以去瑞士!」又指若到瑞士會赤裸上身、下身穿單車泳褲表演人肉雪球以答謝觀眾,而Stephy則要穿泳裝坐雪車。小方又謂希望女友能憑此片入圍電影獎項:「睇啲影評話佢值得入圍,但我睇嚟睇去都冇我個名,對手都好重要(口架),你入圍記得多謝小弟!」Stephy則謂未有想過獲獎,得到觀眾認同已感開心。

岑日珈將切水瘤

有份客串的岑日珈早前認子宮生水瘤,她透露將於月尾做微創手術將約7cm的水瘤切除,不過就未想過停工休養,剛出道的她怕休息太久會失去工作機會。她最初表示水瘤屬惡性,但未知是否癌症或需要化療,不過網上資料顯示水瘤是指一種良性卵巢囊腫瘤,屬惡性機會不高,及後記者再以電話訪問岑日珈,她就說:「醫生幫我抽咗組織,個結果出嚟指數係唔好,醫生話呢個水瘤有傷害性,所以要我及早切除,如果再拖,有機會病變,變成惡性!」

文:影視組