祖兒 朱明銳 握手破冰
容祖兒和張敬軒成為2015年度音樂頒獎禮的「獎王獎后」，英皇特別舉行獎項大滿貫慶功宴，並為旗下得獎歌手洪卓立、泳兒、林欣彤、羅力威、鍾舒漫、馮允謙、陳凱彤等在樂壇頒獎禮共贏得73個獎項的驕人成績祝捷，席上祖兒與朱明銳冰釋前嫌「握手」泯恩仇。
與祖兒曾鬧出「豎中指捽鼻」風波的新城知訊台台長朱明銳都有出席，祖兒主動向銳哥打招呼及提議合照兼「世紀握手」，問及祖兒時她說：「冇嘢喎，我有打招呼，好乖呀！」軒仔笑問：「啲手指有冇亂郁呀？」祖兒說：「有，攞住隻杯碰咗吓，我見大哥（吳雨）頭先想捽鼻，我叫佢唔好呀！」祖兒還祝福將退休的銳哥有新的發展環境。
張敬軒撐陳少寶
講到銳哥稱退休與當日「豎中指」有關？祖兒說：「佢係大情大性人，有一刻表示咗佢情緒，唔開心，解釋過後唔會放心內，佢都係緊張件事，緊張個騷啫。」問到軒仔舊老闆陳少寶亦因鬧新城而被終止節目，軒仔直指對方是恩人定會支持：「客觀講傳媒結束或解僱員工係屢見不鮮嘅手法，我都有做金融或保險嘅舊同學都突然被解僱，所以我哋公司有人情味好多。」祖兒亦說：「我哋公司唔炒人嘅，有人情味又簡單，畀我哋好安心做嘢。」
攞「長期服務金」
各大頒獎禮結束，祖兒稱前晚貪靚臨時換了高踭鞋，昨日起床後右腳很痛要休息數天，假期後會到韓國拍ＭＶ。軒仔則說晚上便飛，去一個清靜之地靈修。祖兒即笑軒仔：「佢零舍多嘢諗嘅人，佢冇我咁唔諗嘢。」軒仔自嘲：「我成日一個諗……嘢樣。」最爆笑是問祖兒會否和男朋友慶祝時，她以為是問軒仔望着他，當得悉會錯意時祖兒哈哈大笑說：「我仲以為你哋咁大膽問呢個問題添！」軒仔叫祖兒小心說話，全場爆笑。因祖兒第十二度奪「最優秀流行歌手大獎（女歌手）」，軒仔提議英皇頒「長期服務金」給祖兒，祖兒亦說想攞老人牌呢。
同場的泳兒透露在ICU的母親仍未醒，但身體狀況有進步，面色紅潤不少。可想過結婚為母沖喜？她表示若要結婚，會等媽咪醒來親眼看着她出嫁！
文：音樂組