古天樂巴西開片驚唔見行李
古天樂、張家輝將會為新片到巴西拍攝兩星期。古天樂表示不擔心人身安全，亦會事前打針以備無患，唯擔心轉機時有風險遺失行李。而張家輝則笑言自己行李沒有貼Barcode，但經常發生遺失行李事件，天生有「唔見行李命」。
藝人古天樂、張家輝、吳鎮宇、佘詩曼、張秀文等，昨日出席《使徒行者》電影版的開鏡活動，大會即場宣布電影將到巴西取景拍攝。古天樂表示會到巴西兩星期：「未去過，但都唔會擔心治安。當地都舉辦奧運，同埋有旅遊點，啟程前打針就得，不過知道要搭長途機要轉機，擔心再轉機時會有風險（遺失行李）。」
另外，問到會否返無綫拍劇，他表示若遇到好劇本又夾到時間便會考慮。對於有傳他身家達十億兼出入有五保鏢陪同，他則表示「無回應」。
張家輝帶底褲
同場的張家輝表示到巴西工作不會夜蒲故不擔心安全。問到會帶甚麼到當地，他笑言：「底衫、底褲囉。（怕像李克勤被寄失行李？）我都冇貼嗰啲barcode上去，不過呢啲事成日發生喺我身上，我係有呢啲命，叫做『唔見行李命』，好彩每次都拎番。」現場所見他與無綫高層樂易玲密斟，問到是否邀他返無綫，他說：「依家咪返咗囉，拍電影。」
鎮宇幫口解圍
另外，佘詩曼被問到「網劇」《使》會否演出，她說：「拍咗呢個先，兩樣嘢，唔可能同時間。（傳不續約無綫而被飛？）唔關事，要做完一樣還一樣。」另外，對於有預言家批她感情事不順，會遇壞人，她表示：「唔係啩？今次遇到唔係壞人啦（吳鎮宇）。」在旁的吳鎮宇幫口說：「對追佢嘅男仔有信心。（介紹男仔畀佢？）佢咁筍，橫掂都識壞人，唔介意啦，佢識揀人。」
導演文偉鴻被問到林峯未有演出電影版，他表示總有機會聚頭：「喺創作過程中都傾咗好多次。最後經商議後才決定。」而錢嘉樂笑老婆湯盈盈欲自動請纓到巴西做助手，他說：「咁個女邊個湊？」
文：影視組