李蘊雙喜臨門 搶佗猴B

李蘊與拍拖三年的前內地銀行行長、現轉攻商界的羅章冠拉埋天窗，一對新人原來早於去年6月8日已在廣州註冊結婚，前晚則在老公家鄉海南島舉行婚禮。據知秘密有喜的李蘊是雙喜臨門，她昨日在電話中未有否認，笑說：「我ready，如果有我會講，我都想要猴B。（係咪怕小器未講得？）總之我一有好消息會張揚。」她自爆在婚禮上與老公都開心到喊：「我先生係好平實嘅人，唔係點講嘢，唔會浪漫，同我性格好唔同，昨晚（前晚）佢講愛的宣言係好難得，我同佢都有喊。」

長輩心急行禮

李蘊透露註冊前幾日老公才向她求婚，她笑說：「好簡單唔誇張，可能知我嫁硬佢，唔使點求。」她承認婚禮搞得很倉卒，兩、三個星期前才籌備，因為註冊後本來沒有計劃太快擺酒，但家人心急擇日指3日是大好日，連婚紗她都是買現成，李蘊說：「我覺得件婚紗好靚，但啲網民話唔啱身，因為唔係度身訂造，班姊妹係我小學、中學同學，（何）超蓮、G.E.M.（鄧紫棋）都係好急先通知，你知佢哋幾忙。（香港會補擺喜酒？）冇咁快，回吓氣先。」

李蘊獲老公錫到燶。

李蘊疑有喜，上落車時老公當然拖到實。

姊妹後補賀禮

李蘊的老公羅章冠是家中獨子，前日他們一早到老公海南島鄉下的農村祭祖，身穿金紅色裙褂的李蘊，頭戴金頭飾、頸上戴住大金豬，加上雙手多對龍鳳鈪，斤両十足，嫁得風光，她說：「係佢屋企習俗，嗰度好熱鬧，都開咗成40圍。」前晚可是洞房花燭夜？她笑說：「好攰呀，由朝忙到晚，攰到涼都唔想沖，但因為頭髮有噴髮膠唔洗唔得。」婚後她會廣州、香港兩邊走，暫時未有計劃去度蜜月，因為老公工作很忙。

前晚婚宴上李蘊僅邀請超蓮、G.E.M.兩位圈中人，她笑言兩位好姊妹已送上大祝福，她笑說：「何小姐好笑，佢話因為太急唔記得帶賀禮，急到手忙腳亂，唔緊要啦，其實佢同G.E.M.準備咗一份神秘結婚禮物畀我，但唔可以帶嚟海南島。」昨日李蘊也在網上公布結婚喜訊，感謝大家對她的祝福。

文：音樂組