胡杏兒沙頭角拜堂要一年抱三
剛榮升「李太」的胡杏兒昨日隨老公李乘德，前往沙頭角禾坑村的「李氏宗祠」拜堂成親，兩人又依足客家傳統習俗簽紙、讀誓詞，杏兒更笑稱：「希望一年抱三！」
胡杏兒與金融才俊李乘德（Philip）於上周一（28日）舉行盛大婚禮，身為沙頭角禾坑村原居民兼長子嫡孫的Philip，昨晨攜同太太杏兒返沙頭角禾坑村的「李氏宗祠」，並依照客家傳統習俗於祠堂拜堂成親，杏兒的父親和繼母均有到場見證。一對新人以一身「紅噹噹Look」現身祠堂，一眾親友及村民也一早到場恭候，門外除了掛上喜慶的對聯外，現場更安排了舞麒麟、放炮仗，場面熱鬧。
全身紅噹噹入祠堂
之後，身穿紅裙、皮褸加頭飾的杏兒，與穿上紅色冷衫配黑褲的Philip，十指緊扣走入祠堂內進行簽紙儀式，他們跟足傳統下跪、拎繡球，十足拍戲一樣。宣讀誓詞時，本來嚴肅的兩人又忍俊不禁，杏兒笑道：「因為之前已經感動過，所以今日搞笑居多。」接着，二人又向現場親友敬酒，席間，杏兒又獲主持人祝三年抱兩，聽畢不斷甜笑的她笑稱：「希望一年抱三！」
以客家話自我介紹
事後，杏兒自言是首對新人於祠堂裝修後進行拜堂，她說：「都係跟番傳統儀式，雖然已經註咗冊結咗婚，都係想傳統啲，Philip嘅屋企好鍾意傳統禮儀，同埋佢係長子，我哋都會配合番傳統。」儀式上，杏兒又大騷quali以客家話自我介紹，她表示：「今日見到個祠堂翻新咗，好靚，同埋儀式上有個主婚人，佢係客家人，用客家話講啲儀式嘅嘢，成個儀式都有少少拜堂feel，現場仲安排舞麒麟，呢樣係客家人嘅傳統。」
文：影視組