Kay導彈夠誇：陰影嚟啫！
「女神」謝安琪（Kay）前晚以谷胸脹爆Look出席頒獎禮，逼出湯碗胸的她除露出麒麟臂，領獎鞠躬時不經意倒奶「搶Fo」，已為人母的Kay睇完導彈相後忍不住大叫誇張，並以「陰影嚟啫」掩飾尷尬，更着記者不要老是留意其身材。
人妻Kay前晚穿上Tube Dress襯長手套出席「2015年度叱咤樂壇流行榜頒獎典禮」，谷出三吋事業線兼湯碗胸，全晚表現風騷，當接過「我最喜愛的女歌手」獎鞠躬答謝歌迷時倒出「導彈胸」，令人側目，她受訪時說：「你成日留意呢啲嘢，唔知點答。」當她欣賞完倒奶相不禁大叫誇張，她說：「陰影嚟啫，我嘅重點從來唔喺身形度，我係內涵派。」
Kay透露過去一年肥了十多磅，她說：「一直唔係好管體重，好忙同有壓力就會瘦，體重好似股市有升有跌、可加可減，真係唔介意，鍾意自己肉冧冧覺得好正。」並否認再度懷孕，她說：「唔好亂講啦，嚇親我主診醫生，打畀張生（張繼聰）確認我係咪有咗。」對於張繼聰表示有意生猴B，Kay說：「如果要生個猴B唔急，有十二年時間。」
戥「新人王」開心
對於與麥浚龍合唱的《羅生門》於「我最喜愛的歌曲」敗給「新人王」吳業坤的《原來她不夠愛我》，Kay說：「冇覺得唔抵，反而戥佢開心，衷心祝福佢，想佢個頭開得咁好，以後行得順順利利。」再次奪得「我最喜愛的女歌手」的Kay表示很開心及滿意，她說：「反而未試過攞女歌手金獎。」
採訪：音樂組