吳業坤唔嗌加價繼續住公屋
「新人王」吳業坤於前晚的叱咤頒獎禮上掃三獎，還激動得下體現「巨鵰」！他事後抵死指是父母賜予的優點，其後才解釋穿了厚底褲所致。坤坤又表示對贏獎後加價與否冇所謂，暫時以賺錢儲首期為目標，繼續住公屋。
近期人氣爆燈的吳業坤，前晚以「新人王」姿態於《2015年度叱咤樂壇流行榜頒獎典禮》上擸走三獎，其中更力壓陳奕迅與張敬軒等一線歌手奪得「我最喜愛的男歌手」與「我最喜愛的歌曲大獎」，令人驚喜！不過，心情激動的坤坤除了招牌的「眼鏡起霧」外，領獎時還出現下體激凸，成為全場焦點！坤坤完騷後接受訪問，對於「激凸」一事他笑說：「可能直條嘅關係啦！真係好激咩？呢啲都係父母畀我嘅優點嚟嘅……我講緊着衫好睇咋！條底褲厚啫！怕凍啊！」
爆龔嘉欣零表示
問到台上爆喊時所說的話，坤坤說：「完咗比賽（指《超級巨聲》）嘅時候，見到林欣彤同許廷鏗開始有歌，諗住排隊有我啦，但排吓排吓就到今年，諗番覺得自己等到機會，又會驚啲人係唔肯聽我唱歌。」他自言不會因而驕傲，因台下很多歌手比自己更努力，問到可會因而加價？他坦言要視乎公司安排：「不過我就冇乜所謂嘅。（好快唔使住公屋？）要呀！個樓市都未暢旺，都未係適合時候買樓，或者儲到首期。」至於緋聞女友龔嘉欣可有傳訊息恭喜？坤坤指稍後拍劇時會見到對方：「可能到時佢先恭喜我。（請佢食飯？）要請好多人食飯，總之今年要用好多錢還飯債！」
當坤坤勇奪三獎的消息一出，隨即在網上瘋傳，不少藝人亦被其努力所感動，紛紛送上祝福。昨日，坤坤再次在網上與大家分享喜悅，除了於Instagram寫下長篇感言外，上載的其中一張與好友欣宜、許廷鏗及胡鴻鈞的合照中，只見坤坤將三個獎分給好友，自己手執只有一個「生抽獎」，非常搞笑！另外，台上激凸的他又將在家中試衫時的照片放上網，並留言：「喺屋企試衫嗰陣時冇事o架！」
張敬軒讚贏共鳴
雖然軒仔被坤坤搶走「我最喜愛男歌手」一獎，但他亦大方讚對方有觀眾緣，認為坤坤今次得到好成績是天道酬勤：「佢象徵某啲香港人，依家好多年輕人喺佢嘅音樂得到共鳴，佢啲歌有幾百萬點擊率，我死追爛追都係得幾百，真係好犀利！」對於坤坤「動L」一事，軒仔笑說：「有大獎攞，我都動L，值得動L，但我講手指公咋喎！」
做硬新人王
作為新人，吳業坤今年在樂壇的成績「超晒班」，他先在《勁歌金曲頒獎典禮》獲頒「最受歡迎新人獎」與「勁歌金曲獎」，其後又在《新城勁爆頒獎禮》贏得「新城勁爆年度新人王」，而在前晚《叱咤樂壇流行榜頒獎禮》上更連掃「叱咤樂壇生力軍」金獎、「我最喜愛的男歌手」與「我最喜愛的歌曲大獎」三獎，暫時已有六獎在手！周三將舉行《十大中文金曲頒獎禮》，相信坤坤食住個勢，大有機會擸走「最有前途獎」金獎做大滿貫「新人王」！
文：音樂組
攝：鄭家俊、劉智源、唐豁莊