超盈猷君high tea 分頭走人
不久前爆出和新加坡二人女子組合BY2細孖Yumi分手的何家四房公子何猷君，昨日下午相約家姐何超盈及多名友人於中環食tea，一行人醫肚後正準備步出商場等司機前來接載，期間友人發現記者拍攝，為免被追訪猷君即與超盈分頭行，並火速失去蹤影，當記者問到超盈聖誕如何過，她笑說：「冇乜特別去玩，乜你哋唔係追我細佬咩？」
而三房千金何超蓮自從回復單身後即傳出有富二代男友，早前有指已故霍英東孫兒霍啟山力追她，昨日二人更被拍得同遊廣州。對此超蓮透過公關鄭紹康回應表示近期所有「追求者」都是新聞炒作，並非事實。三太助手亦為超蓮否認戀情說：「超蓮成日都會上大陸跟吓媽咪打理嘅生意，何太喺廣州有個高爾夫球場，嗰日咁啱撞到，席間仲有其他同事，唔知點解淨係影到佢兩個。佢哋真係唔係拍拖，何太都話唔係，超蓮好陰功，畀阿媽鬧到喊，佢覺得點解啲人成日要追住佢？搞到佢依家疑神疑鬼，唔敢出街。」
另外，歌手楊千嬅昨日亦帶同寶貝囝囝丁進諾現身中環，期間巧遇名媛趙曾學韞，兩人老友鬼鬼地拍照留念後才道別離開。
