譚耀文怕捱泰臣重拳 出錢搵替身

《葉問3》在港上映五日，大收旺場收2,300萬票房，有份參演的譚耀文與兼任電影監製的黃百鳴昨日到電台接受訪問。講到第三集邀得前拳王泰臣演出，黃百鳴稱：「呢個係吸引點嚟，但最緊要都係成部戲。」

戲中阿譚被泰臣揮拳打到飛起，問可有受傷？阿譚笑言：「我個心傷咗，係嚇到傷咗，我企圖喺埋位之前諗住用少少美金收買人，搵替身幫我頂咗佢。現場啲工作人員都擔心我，問我頂唔頂得住，總之嗰一刻又驚又喜啦，可以捱到泰臣幾拳都係榮幸。」他又笑謂：「我不入地獄誰入地獄，但如果有第四集我要做番好人。」

甄子丹一家與《星戰7》導演及演員合照。	張晉（左起）、蔡少芬、陳法蓉、韓馬利結伴睇戲。	黃百鳴（左）與譚耀文到電台宣傳電影。

下月舉行慶功

身為電影公司老闆的黃百鳴表示有信心超越《葉問2》的4,300萬票房，香港應該能超過5,000萬票房，其他上映地區都紛紛報捷，所以決定一月八日舉行首輪慶功宴。問可會開拍第四集？他稱不能太草率，開拍第三集時都相隔一段時間，因當時坊間太多葉問電影。

張晉拉隊睇戲

同樣有份演出《葉3》的張晉，昨日他與太太蔡少芬、好友陳法蓉和韓馬利等一行九人拉大隊到商場睇戲，蔡少芬表示：「我哋自己買飛支持(口架)。」抵死的張晉在記者拍照前說：「等等，戴番副超先。」

另外，「宇宙最強」甄子丹於上海為另一部片《星球大戰：原力覺醒》（《星戰7》）宣傳，獲太太汪詩詩及一對仔女陪同出席，更成功野生捕獲導演JJ阿伯拉罕（J.J. Abrams）、演員黛絲烈尼（Daisy Ridley）及約翰保也加（John Boyega）影大合照。

文：音樂組