吳業坤唔認龔嘉欣：同其他人發展吓先
藝人吳業坤、張秀文及許廷鏗等昨日到油塘宣傳無綫外購劇《無心法師》，張秀文以低V裙亮相，比同場密實示人的劉佩玥性感，於台上表情多多，心情大靚。
吳業坤前晚獲《新城勁爆頒獎禮》「勁爆新人王」，他謙稱：「唔敢當。（有信心元旦日攞埋男歌手獎？）應該冇機會，我係新人應循序漸進。（緋聞女友龔嘉欣恭喜你？）有恭喜我，好多朋友都有message我，我覆到好夜先瞓。（打算喺頒獎台上公開愛的宣言？）等我搵到夠好嘅同認定嘅伴侶先，（嘉欣唔夠好？）都未係一個對象，等我同其他人發展吓先。」
張秀文租經理人間房
張秀文指劇中角色無心與月牙可歌可泣的愛情，令她感動。當記者指她露bra帶，她說：「有咩？我有打底喎，做足安全措施！（心情大靚因與經理人蜜運中？）唔係，我只係喺佢屋企租間房做迷你倉，因為我屋企裝修，租咗3、4個月。（你屋企豪裝要搞咁耐？）改間隔、杜白蟻，好多嘢搞。（經理人啱你擇偶條件？）做嘢為主，唔諗，隨緣啦！（你會幫手執埋屋？）我自己啲嘢都執唔掂啦，煮埋飯好唔好？」
許廷鏗被指與劇中男主角韓東君似樣，他說：「人哋憑個劇喺內地被封小鮮肉又爆肌。（你都考慮爆肌？）我得咩？（連續唱咗幾首主題曲，想做劇集歌王？）呢啲唔係我想就做到。（多數係你、鄭俊弘、吳若希唱？）其他歌手安排唔到啫，輪住嚟嘅。」
文：影視組