Super Dry Girls 冇仔埋身
Super Girls自爆單身過聖誕，乾到轉型做「Super Dry Girls」！五女又笑稱公司揀Job指標「謝絕男性」，令她們難以認識異性，揚言下年要齊齊「脫單」。
組合Super Girls（SG）昨日出席《第13屆香港冬季購物節》即場跳唱《黑色西裝》及《一拍即愛》兩首歌，又與歌迷大玩遊戲，引來不少粉絲圍觀。問到平安夜可有約會，五女居然自嘲「Super Dry Girls」聖誕佳節要單身過：「我哋完成活動就各自歸家，人哋以為我哋聖誕唔會冇嘢做，但其實我哋個個都返屋企，頭先我哋喺車度都話其實我哋Super Girls都幾dry喎。」
下年勢要「脫單」
SG又搞笑地怪公司令她們年年Dry爆：「我覺得係公司搞鬼，佢哋知道有啲活動會識到男仔，所以就幫我哋推晒，我哋要同公司反映，就算拍拖都可以專注事業。」而下一個最快生日的隊長Aka更笑言會犧牲小我，用生日願望為成員許願，望大家下年齊齊脫單！提到聖誕可會一齊開派對，五女表示好友C AllStar亦會與她們一齊慶祝，問到兩個組合老友鬼鬼，可有發展空間？五女即說：「撻唔着啊，太兄弟喇！」
頒獎禮盡騷性感
此外，SG表示餘下的三個頒獎禮亦會出席，問到衣着可會性感？她們笑言：「有料就着啦！」談到歌曲《一拍即愛》成功入圍「叱咤樂壇我最喜愛的歌曲」20強，SG直言若果能再晉級入10強便是最好的禮物。Heidi更不忘拉票，笑言：「大家要開多幾個Account一齊投票！」
文：音樂組