陳浩民慰勞老婆4年抱4開心做蟹

在美國加息的陰霾下，樓市寒風陣陣，最新一期《好報》披露不少紅星摸頂買磚頭，隨時變成「樓蟹」。儘管樓市不景氣，可是圈中不少「愛妻號」無懼當「蟹兵」，為了嬌妻和子女於今年入市掃貨！當中以四年抱四、就快又做老竇的陳浩民最具心思，於今年7月豪擲4,505萬元，購入紅磡維港‧星岸2,160呎相連單位，這份送給老婆蔣麗莎和仔女的聖誕節禮物，絕對唔講得笑。

「太太真係好旺我」

陳浩民近年轉戰內地吸金，據知今年已賺逾千萬人仔，將來一屋六口小朋友又多，今次買2千多呎單位，真係啱啱好。本報致電陳浩民，他表示全因老婆旺自己，才能買4千多萬的豪宅，即使樓價跌也不怕：「呢份係送畀太太嘅聖誕禮物，等佢開心吓，而且都係自住，跌唔跌都唔使驚！不過，與其話我送畀太太，不如話佢送畀我，因為太太真係好旺我，佢唔旺我邊有錢買樓畀佢！」

今期《好報》披露不少藝人摸頂買樓，隨時變樓蟹。	陳浩民與蔣麗莎在微博大晒互攬照片。	王祖藍笑言其1.14億豪宅落老婆李亞男名，就算蝕都是老婆蝕。

陳浩民表示老婆將為他誕下第四個小朋友，成為自己的原動力，他說：「就快有第四個小朋友，大家都知香港要搵多房嘅新樓勁難，所以我今次都係買相連單位，加埋都有六、七間房！」新居裝修是否老婆話事？他說：「梗係，我出年五月先入伙，依家新屋裝修都係太太Idea！」

祖藍：蝕都係蝕老婆

另一位「愛妻號」王祖藍亦不讓陳浩民專美，今年8月以1.14億「摸頂價」，購入大埔逸瓏灣8座頂層2,809呎連平台天池屋，創該屋苑最高「癲價」，祖藍錫老婆李亞男錫到燶，物業只登記老婆個名，變相大嗱嗱億幾贈妻，成一時佳話。惟祖藍摸頂入市，如今樓市下行，問祖藍會否擔心變樓蟹？他接受本報電話訪問時大無畏說：「自住冇所謂啦！長遠嚟講冇問題，最緊要安居樂業！」問是否覺得買貴樓，他即搞笑地說：「唔緊要啦！蝕都係蝕老婆啫，因為間屋係李亞男個名！」

麥包向妻許諾買樓

至於同樣錫老婆的麥長青（麥包），於今年9月以427萬元買入紅磡環海‧東岸310呎一房單位給老婆收租，本月又以800萬元買入18,000呎的荃灣工廈，掃貨絕不手軟。談到新樓跟好友陳浩民同區，麥包在電話中說：「佢嗰間貴好多，但我拍拖時曾對老婆許下承諾買樓畀佢，而呢間屋可以做九成半按揭，所以拿拿聲去買，做人一定要有口齒，拍拖時送唔到鑽石咪送碎鑽，依家買唔到大屋送細屋都好！」會否趁樓價跌再入市？他表示要睇啱心水都會決定。

三位圈中愛妻號今年購入的物業升跌未卜，可是已有藝人因摸頂買磚頭帳面唔見一大截。張栢芝於2011年購入的中半山世紀大廈頂層特色戶，去年曾高開2億元放售，至今仍乏人問津，如今其單位市值已跌至1.1億元，帳面唔見1,800萬元。而「超級愛妻號」陳豪於2013年，以3,368萬元購入的大埔比華利山雙號屋，如今市值跌至2,500萬元，帳面足足唔見四分一，太太陳茵媺明年又就生得，唔努力搵奶粉錢點得！

文：專案組

採：影視組