Kelly拒接真人騷 唔見半億

Kelly一連九場的《陳慧琳let's celebrate！世界巡迴演唱會》前晚舉行第五場，吸引嘉賓張家輝一家三口、容祖兒及連詩雅等人捧場。適逢前晚冬至，已為兩子之母的Kelly唱到金曲《星夢情真》時，左右手拖住乖仔劉昇及劉琛邊唱邊行到台中。生鬼的兩兄弟更不停隨音樂旋律向觀眾揮動螢光棒，Kelly更叫兩個囝囝向台下的爸爸Alex打招呼，又將個咪遞給他們向歌迷講「Merry Christmas」。萌爆的劉琛更應要求做出伸脷可愛樣，令觀眾拍爛手掌。

玩得開心不捨落台

Kelly笑言阿媽唔易做：「我覺得難過做歌手。」並叫觀眾把握機會為三母子留倩影：「影多啲呀，好難得有呢個機會。」首次上紅館舞台的兩兄弟，開心到不捨得落台，不停搖頭Say No，搞到Kelly束手無策要出動助手及女傭硬拉兩人落台。由於Kelly忙於開騷，故將湊仔責任交畀老公，更鼓勵對方謂：「仲有幾日啫，頂住呀，OK？」嘉賓之一的雷頌德則大讚Kelly是廿四孝好媽咪，不會因天后身份而剝削囝囝權利，他說：「好敬佩你，Good Mother。」

在台下睇騷的Alex，不時揮動螢光棒為太太及兩個仔仔打氣。	玩到唔願落台的兩兄弟，臨行前窩心地錫錫媽咪say goodbye。	吳國敬（左）與連詩雅齊齊到場睇騷。

以讀書為重怕辛苦

由於Kelly首次與兩個囝囝同台演出，神秘驚喜掀起全晚高潮。據知，近年多間內地電視台曾極力游說Kelly與兩個囝囝參加真人騷，有電視台更開出天價利誘，可惜Kelly不為所動。就此事，記者昨日致電Kelly經理人鍾珍，她直認說：「自從內地播出《爸爸去哪兒》節目後，有四、五個內地真人騷搵過Kelly三母子參加，不過Kelly冇接。（唔見四、五千萬人民幣？）唔係錢問題，小朋友嘅父母怕小朋友辛苦同讀書為重。」

文：音樂組