洪永城拍拖過節炮製驚喜

藝人洪永城、劉佩玥、岑麗香、姚子羚、吳若希等人，昨日為劇集《實習天使》到中學捐血宣傳，吸引大批學生爭相合照。現場，岑麗香和姚子羚因服用了中藥調理身體，故未能即場捐血。

冇時間親自下廚

首次捐血的洪永城表示捐血可以幫人，笑言：「一陣睇我有冇變得靚仔咗。（叫埋女友唐詩詠一齊捐？）都好。」首年與女友唐詩詠過聖誕，他表示會食飯慶祝，並說：「準備咗一啲驚喜，因冇太多時間去準備，希望佢鍾意啦。（親自下廚？）我都想，不過籌備時間比較少。」同場的岑麗香亦是首度與男友共度聖誕，但她因工作在身，正日要拍新劇《火線下的江湖大佬》。問到買了甚麼禮物給男友？她未有透露，指屆時只可透過視像見面。

香香深受學生歡迎，親民舉機自拍。	劇集《實習天使》昨日舉行捐血宣傳。	吳若希有份捐血救人。

吳若希大呻委屈

同場，姚子羚對於其閨蜜龔嘉欣被緋聞男友吳業坤粉絲人身攻擊，姚子羚說：「可能粉絲太錫吳業坤。其實佢哋感情好好，畀佢哋一啲空間！（二人襯嗎？）佢哋個樣都好cutie，好襯。」至於會否撮合他們？她說：「感情事無法幫，佢哋可能真係姊弟情呢！」歌手吳若希被指與無綫加簽五年合約來換獎項一事，她坦言感到委屈和很灰，努力似被抹殺了。對於有指續約後底薪加了一倍，她說：「年年都有加。（一倍？）加咗啲，唔方便講。（拎咗金曲金獎令汪明荃不滿？）相信唔會，如果喺言語上失誤令大家唔開心，會同佢講唔好意思。」

文：影視組