張美妮睇燈飾愈逼愈開心

本想到外地旅遊過浪漫聖誕的張美妮，因與老公「度期」失敗，決定留港過節：「當然同老公過啦，之前講過拍完《巨輪2》想去旅行，但我又接咗新劇老公又忙，所以未去到，希望下年啦！」她又表示一定會預留一天與家人過聖誕，從小至今都風雨不改睇燈飾，感受普天同慶的佳節氣氛：「細個時Daddy已經開西餐廳，成家人落去食聖誕大餐之後一齊出尖沙咀行，影靚相，有好多開心回憶，所以到依家大咗都一直keep住去，雖然好逼，但嗰種熱鬧氣氛令人好開心！」

織頸巾白費心機

問到送禮心得，美妮笑言自己懶，故介紹了一個「快、靚、正」方法，對男女老少都使得：「通常我會去一間shop一次過買晒畀所有人，多數買朱古力、handcream，臨近聖誕啲嘢又包裝得好靚，啱晒我呢啲懶人送！」但她亦謂結婚後要多花心機氹老公：「對住另一半我都幾少女，試過親手織頸巾畀老公，結果送咗畀佢之後佢一次都未戴過，又話拮住條頸跟住擺埋一邊，但織嘅過程好開心，因為每一針都係諗住佢，我諗佢都覺得sweet嘅！」

細心的張美妮親手整聖誕蛋糕冧老公。	張美妮	張美妮笑言曾織頸巾送老公，但老公卻嫌「拮」冇戴過。

熄燈等老公放工

美妮續說：「結婚前後嘅聖誕都有唔同，拍拖時冇點花心思，反而結咗婚覺得自己身為太太，責任大咗，會着重點令老公開心，想令佢返到嚟屋企覺得好warm，佢覺得warm就自然更加愛我呢個老婆！屋企都會好花心思去布置，今年買咗棵好大嘅聖誕樹，通常佢臨返屋企我哋都會通電話，我知佢就返到就會熄晒啲燈又播定聖誕歌，等佢一開門就好surprise。」呢個老婆認真識氹老公！

文：陳丹　

攝：秦健輝　

場地：美國餐廳