Bob聞慘叫勁驚 嚇到險標屎
口才了得的林盛斌（Bob）前晚於Talk騷尾場邀請歌手周柏豪做嘉賓，豈料遭大整蠱！Bob誤以為有工作人員發生意外，頓時不知所措，得知真相後坦言嚇得底褲盡濕兼差點標屎。
一連兩場由林盛斌（Bob）孭飛的《Bob's Up伊館2015》前晚圓滿結束，尾場有一班圈中好友如胡定欣與梁烈唯等捧場，歌手周柏豪與C AllStar則任嘉賓。席上，柏豪聯同「玩爆你個胃」成員Kevin仔玩謝Bob，場面逼真。
知真相鬧爆
當獻唱完畢後，柏豪踏上升降台準備返後台，惟升降台出現故障「唔上唔落」，未幾台下更傳來慘叫聲，有工作人員一臉緊張於Bob耳邊講俏俏話，搞到Bob頓時呆滯片刻，此時Kevin仔便衝上台與柏豪哈哈大笑，Bob才驚悉被玩，並笑罵眾人：「我要隊冧晒你哋，搞到我底褲濕晒，差啲標『茄』添！」及後，他嘗試平靜情緒繼續做騷，但仍大呼驚魂未定兼笑說：「你班死粉腸！」
準備大報復
完騷後，Bob受訪時坦言事前全不知情，被玩時認真嚇餐死，不忘讚柏豪演技：「驚啲工作人員夾到手，當時個工作人員仲走埋嚟叫我個騷繼續喎！我心諗好唔好睇吓發生咩事先，冇耐Kevin仔就出現，我先知佢哋搞啲咁嘅嘢！（報仇？）放心一定！你做初一我做十五，頭號梗係柏豪。」提到節目尾聲感慨指甚少時間陪家人，首場喜見雙親捧場，卻發現兩人蒼老不少，Bob說：「呢年都係過節見到幾次，所以我唔想Miss嚟緊聚會嘅機會，希望多啲時間陪佢哋，聖誕節有一日假，可能到時喺屋企過。」
文：影視組