甄子丹讚4D效果逼真口水吐觀眾
「宇宙最強」甄子丹昨日現身電影《葉問3》謝票，有份參演《星球大戰》外傳的他，無懼同期與《星》片系列力撼，更搞笑呼籲觀眾：「中、西兩餐都可以食。」子丹又對首部4D功夫片效果非常期待，笑言想睇吐口水一幕：「係咪真係有口水吐落塊面？」
甄子丹昨日偕譚耀文，出席主演電影《葉問3》謝票活動。首次在港謝票的子丹表現親民，席間與觀眾玩自拍兼簽名，粉絲們也相當興奮。子丹說：「喺香港謝票係近幾年先流行，我覺得係應該嚟多謝觀眾，呼籲大家入戲院睇。」並謂稍後到台灣宣傳，聖誕節將返港一天與家人度過。譚耀文提議對方帶子女欣賞4D版《葉》片，子丹即笑謂：「我都想睇，吐口水係咪真係有口水吐落塊面？老闆黃百鳴話好堅，《葉》片係第一部4D嘅功夫片。」
睇晒中西片最好
提到電影《星球大戰：原力覺醒》同期上映，問到對票房有否信心？有份拍電影《星球大戰》（Star Wars）外傳《Star Wars：Rogue One》的子丹說：「《葉》片有一定擁躉，相信有一定感情。試映、首映口碑非常好，大家一致都讚，加上《Star Wars》我都有份參演下一部，對我嚟講，最好兩邊都好，觀眾都應該有得揀，中、西兩餐都可以食。」
唔心急拍第四集
問到是否有意開拍《葉》第四集？他說：「講吓啫。（唔係一路拍落去？）睇吓點先，好多嘢冇得急，需要醞釀，加上要各方面配合，電影係講teamwork，有時可能係劇本未寫好或導演未諗到方向，當大家覺得係時候就應該要拍。（唔怕再等五年？）如果真係要等都要，觀眾最緊要，想睇先會拍。」
文：影視組